12 اپریل ، 2021 
وزیراعظم نے بجلی کی قیمت بڑھانے سے منع کردیا ہے، تابش گوہر
12 اپریل ، 2021
وزیر اعظم عمران خان کے معاون خصوصی برائے پاور تابش گوہر نےکہا ہےکہ بجلی کی قیمت نہیں بڑھائیں گے وزیر اعظم نے بجلی کی قیمت بڑھانے سے منع کر دیا ہے۔
جیو نیوز نے وزیراعظم کے معاون خصوصی تابش گوہر سے پوچھا کہ آئی ایم ایف کو یقین دہانی کے بعد بجلی کب مہنگی ہو رہی ہے ؟
اس پر معاون خصوصی نے بتایا کہ وزیر اعظم سے بجلی کی قیمتوں پر بات چیت ہوئی ہے اور وزیراعظم نے پاور ڈویژن کو بجلی کی قیمتوں میں اضافے سے منع کر دیا ہے۔
معاون خصوصی سے پوچھا گیا کہ اگر بجلی کی قیمت نہیں بڑھاتے تو گردشی قرض پر کیسے قابو پائیں گے ؟
معاون خصوصی کا کہنا تھا کہ مزید آئی پی پیزکے ساتھ بجلی معاہدوں پرنظر ثانی کریں گے تاکہ گردشی قرض نیچے آسکے، ہم نئی پاور پالیسی بھی کابینہ کی توانائی کمیٹی کو پیش کر رہے ہیں۔
