24 اپریل ، 2021 
پولیس نے ابصار عالم پر حملے سے کچھ دیر پہلے کی ویڈیو حاصل کرلی
24 اپریل ، 2021
سینیئرصحافی اور پاکستان الیکٹرونک میڈیا ریگولیٹری اتھارٹی (پیمرا) کے سابق چیئرمین ابصارعالم پر قاتلانہ حملے میں پیشرفت ہوئی ہے۔
ذرائع کے مطابق پولیس نے ابصار عالم پر حملے کے وقت کی ویڈیو حاصل کرلی جبکہ جیو نیوز کو بھی ابصار عالم پر حملےسے متعلق ویڈیو موصول ہوگئی ہے۔
ویڈیومیں دیکھا جاسکتا ہے کہ ابصارعالم پرحملہ کرنے والا اکیلانہیں تھا، ایک ساتھی بھی پارک میں موجود تھا، حملے کے وقت پارک کے باہر ایک کالی کاربھی ویڈیو میں دیکھی جاسکتی ہے۔
ویڈیو میں حملہ آور کریم کلر جبکہ اس کا ساتھی کالےکپڑوں میں ملبوس نظر آرہے ہیں جبکہ ویڈیو میں حملہ آورکو اپنے ساتھی کے ہمراہ پارک میں چہل قدمی کرتے دیکھے جاسکتا ہے۔
ویڈیو میں دیکھا جاسکتا ہے حملہ آورنے اپنے ساتھی سے ہاتھ بھی ملایا۔
پولیس حملہ آور اورپارک کے باہر موجود کالے شیشوں والی گاڑی کی تلاش میں ہے جبکہ ابصار عالم اور عینی شاہدین حملہ آور کو شناخت کرچکے ہیں۔
خیال رہے کہ ابصار عالم پر 20 اپریل کو اسلام آباد کے ایف الیون پارک میں واک کے دوران قاتلانہ حملہ ہوا تھا جس میں وہ زخمی ہو گئے تھے۔
