پاکستان کےحق میں نعروں کی گونج میں اشرف صحرائی مقبوضہ کشمیر میں سپرد خاک

بھارتی فوج کے سخت محاصرے کے دوران پاکستان کے حق میں نعروں کی گونج میں سینیئر حریت رہنما اشرف صحرائی کپواڑہ میں سپرد خاک کردیے گئے۔

سخت فوجی محاصرے کے دوران مقبوضہ کشمیر کے سینیئر حریت رہنما اور تحریک حریت جموں وکشمیر کے چیئرمین محمد اشرف صحرائی کو ان کے آبائی علاقے میں سپرد خاک کیا گیا۔

بھارتی فوج کی قید میں حریت رہنما اشرف صحرائی مقبوضہ جموں میں انتقال کر گئے

چیئرمین تحریک حریت محمد اشرف صحرائی 5 اگست 2019 کے بعد سے جیل میں تھے

کشمیر میڈیا سروس کے مطابق قابض بھارتی فوج نے محمد اشرف صحرائی کی آخری رسومات میں کشمیریوں کو شرکت سے روکنے کے لیے کپواڑہ کے علاقے ٹیکی پورہ میں لوگوں کی نقل و حرکت پر سخت پابندیاں عائد کی ہوئی تھیں اور پورے علاقے کو گھیرے میں لے لیا گیا تھا۔ 

تدفین کے وقت علاقے میں بجلی مکمل طور پر منقطع تھی، جنازے کے شرکاء نے ہم پاکستانی ہیں، پاکستان ہمارا ہے، ہم کیا چاہتے آزادی، سب سن لیں ہم لے کر رہیں گے آزادی کے نعرے لگائے۔

کل جماعتی حریت کانفرنس کی جانب سے کشمیریوں سے اپیل کی گئی ہے کہ وہ گھروں سے باہر نکل کر بھارتی مظالم کے خلاف احتجاج کریں۔

خیال رہے کہ محمد اشرف صحرائی گزشتہ روز بھارتی حراست میں انتقال کرگئے تھے وہ گذشتہ 2 سال سے بھارت کی غیر قانون قید میں تھے۔