ایران نے سعودی عرب سے مذاکرات کی تصدیق کردی

ایران نے سعودی عرب سے مذاکرات کی تصدیق کرتے ہوئے کہا ہے کہ خطے کے دو عظیم اسلامی ممالک کے درمیان اچھے تعلقات پورے خطے کے مفاد میں ہیں۔

سعودی عرب سے مذاکرات کی تصدیق کرتے ہوئے ترجمان ایرانی وزارت خارجہ سعید خطیب زادے کا کہنا تھا کہ خطے کے دو عظیم اسلامی ممالک کے درمیان کشیدگی میں کمی پورے خطے اور اس کے لوگوں کے مفاد میں ہے۔

سعودی عرب ایران سے اچھے تعلقات چاہتا ہے، ولی عہد محمد بن سلمان

ایران پڑوسی ملک ہے، ہم ایران میں ترقی اور خوشحالی کے خواہاں ہیں، ہم نہیں چاہتےکہ ایران مشکل میں ہو ، سعودی ولی عہد محمد بن سلمان

انہوں نے کہا کہ ذمہ دار ملک ہونے کے ناطے دونوں ملکوں کے درمیان مسائل کے حل کا خیرمقدم کرتے ہیں، باہمی تعلقات کے لیے بامعنیٰ سمجھوتوں پر پہنچنے کی قوی امید ہے، اس سلسلے میں ایران اپنی پوری کوشش کرے گا۔

خیال رہے کہ عراق کے دارالحکومت بغداد میں سعودی عرب اور ایران کے درمیان مذاکرات کی خبریں اپریل میں سامنے آئی تھیں جس کی اب ایران کی جانب سے تصدیق کی گئی ہے۔

سعودی عرب اور ایران کے درمیان مختلف معاملات پر اختلافات پائے جاتے ہیں اور 2016 میں دونوں ممالک کے درمیان سفارتی تعلقات منقطع  ہوگئے تھے۔