10 جون ، 2021 
کراچی: پسند کی شادی کرنیوالی لڑکی کی سسرال میں پراسرار موت
10 جون ، 2021
کراچی: اولڈ سٹی ایریا میں پسند کی شادی کرنے والی لڑکی کانتا کماری پر اسرار طور پر موت کا شکار ہوگئی۔
اہل خانہ کے مطابق 32 سالہ کانتا کماری 5 جون کو لی مارکیٹ میں اپنے سسرال میں ہلاک ہوگئی، پسند کی شادی کرنے کے کچھ عرصے بعد ہی کانتاکا اپنے شوہر سے جھگڑا رہنے لگا تھا۔
اہل خانہ نے بتایا کہ کانتا پر اس کا شوہر آنند تشدد کرتا تھا اور جس دن کانتا کا انتقال ہوا اس کے شوہر نے سب کو یہ بتایا کہ کانتا کا انتقال گرنے کی وجہ سے ہوا ہے لیکن معاملہ اس وقت شک میں بدل گیا جب سول اسپتال میں معائنے کے دوران ڈاکٹر کو گلے پر مبینہ تشدد کا نشان ملا۔
اہلخانہ کا کہنا ہےکہ ڈاکٹر کی جانب سے پولیس کیس کا کہنے پر کانتا کا شوہر اسے نجی اسپتال لے جانے کے بہانے گھر لے گیا اور اس کی تدفین کردی۔
پولیس حکام نے جیو نیوز کو بتایا کہ لڑکی کا انتقال گزشتہ دنوں ہفتے کے روز ہوا اور اہل خانہ نے پیر کو درخواست دی جس پر مقدمہ درج کرکے ملزم آنند کو گرفتار کرلیا گیا۔
