انٹرٹینمنٹ

'خدا اور محبت 3 کی پیشکش ہوئی تو انڈسٹری چھوڑنے کا فیصلہ کرچکا تھا'

22 جون ، 2021

جب تک اللہ نہ چاہے اس وقت تک کچھ بھی ممکن نہیں، فیروز خان_____فوٹو فائل

معروف اداکار فیروز خان نے اداکاری ترک کرنے کے حوالے سے وضاحت کی ہے۔

فیروز خان نے حال ہی میں نجی ٹی وی کے ایک پروگرام میں شرکت کی جہاں انہوں نے شوبز چھوڑنے سے متعلق اپنے فیصلے کے بارے میں تذکرہ کیا۔

اداکار نے بتایا کہ جب مجھے ڈرامہ سیریل خدا اور محبت 3 کی پیشکش ہوئی اس وقت میں انڈسٹری چھوڑنے کا فیصلہ کرچکا تھا، میں یہ سوچ رہا تھا اگر میری زندگی میں ایسا مرحلہ آیا کہ مجھے پیشن (اداکاری) یا اپنی روٹس (مذہب) میں سے کسی ایک کو منتخب کرنا پڑا تو میں کس کا انتخاب کروں گا۔

گزشتہ برس مارچ میں اداکار نے شوبز انڈسٹری کو خیرباد کہنے کا اعلان کیا تھا____فوٹو فائل

یہ بھی پڑھیں

جیو کے مقبول ترین ڈرامے خدا اور محبت 3 میں فرہاد کا کردار ادا کرنے والے فیروز نے کہا کہ اس وقت میں نے سوچا یہ گلیمر کی دنیا سب عارضی ہے، اسی لیے میں نے فوری طور پر انڈسٹری چھوڑنے کا فیصلہ کیا تھا۔

اداکار کا کہنا تھا کہ کوئی بھی چیز اللہ کی مرضی کے بغیر نہیں ہوسکتی، میں نے سوچا کہ کیوں نا اپنی اداکاری کو کسی مقصد کے لیے کروں، اسی کیمرے اور اسی ٹی وی اسکرین کے ذریعے دوبارہ کام کرنے کا سوچا تاکہ لوگوں تک مثبت پیغام پہنچا سکوں۔

فیروز خان نے کہا کہ میں اس قسم کی اداکاری کرنا چاہتا ہوں جو لوگوں پر گہرے نقوش چھوڑ جائے۔

واضح رہے کہ گزشتہ برس مارچ میں اداکار فیروز خان نے سوشل میڈیا سائٹس پر جاری پیغام میں شوبز انڈسٹری چھوڑنے کا اعلان کیا تھا۔ اداکار نے اپنی خدمات اسلامی تعلیمات کی تبلیغ کے لیے وقف کرنے کا بھی اعلان کیا تھا۔