افغانستان میں خانہ جنگی سے خطرناک صورت حال پیدا ہو جائے گی: ایرانی سفیر

پاکستان میں ایران کے سفیر سید محمد علی حسینی نے کہا ہے کہ طالبان افغانستان میں ایک فریق ہیں جو امن کے لیے کردار ادا کر سکتے ہیں۔

جیو نیوز سے گفتگو کرتے ہوئے محمد علی حسینی نے کہا کہ وزیر خارجہ جواد ظریف سے طالبان اور افغان حکومتی وفد کی ملاقات مثبت ماحول میں ہوئی۔

ایران کے سفیر نے الزام لگایا کہ امریکا نے پہلے شام اور عراق میں داعش کو پالا اور پھر داعش کو افغانستان میں لایا۔

محمد علی حسینی کا کہنا تھا کہ افغانستان میں خانہ جنگی کا خطرہ منڈلا رہا ہے جس سے خطرناک صورت حال پیدا ہو جائے گی، ایران مزید افغان مہاجرین نہیں لے سکتا اور نہ ہی لے گا۔