پولیس نےلاہور میں قتل کی گئی ماڈل نایاب کی فون کالزکا ڈیٹا حاصل کرلیا

لاہورپولیس نے ڈیفنس کے علاقے میں قتل کی گئی ماڈل نایاب کی فون کالز کا ڈیٹا حاصل کرلیا۔

ابتدائی تحقیقات کے مطابق ڈیفنس کےعلاقےمیں تنہا رہنے والی ماڈل نایاب کو اس کے گھر میں گھس کر گلا دبا کر قتل کیا گیا تھا،نایاب کچھ عرصہ قبل ہی دبئی سے واپس آئی تھی، مقتولہ کی لاش گھر کے اندر فرش پرپڑی ملی تھی۔

پولیس کے مطابق قاتل گھر کے عقبی حصے سے فرار ہوا، نایاب کے گھر سے اس کا موبائل فون بھی غائب تھا ، لگتا ہےکہ قاتل فون بھی ساتھ لے گیا۔

لاہور میں گھر سے ماڈل نایاب کی لاش برآمد

29 سالہ ماڈل کو گلا دبا کر قتل کیا گیا، ملزمان نے نایاب کو تشدد کا نشانہ بھی بنایا: پولیس

پولیس ذرائع کے مطابق قاتل نے لا ش کو برہنہ کرکے قتل کو زیادتی کا رنگ دینےکی کوشش کی لیکن ابتدائی تفتیش کے مطابق نایاب سے زیادتی کے کسی قسم کے آثار نہیں ملے ، اس کے لیے فارنزک سائنس ایجنسی کی حتمی میڈیکل رپورٹ کا بھی انتظار کیا جا رہا ہے۔

پولیس نے گھر اور اس کے اندر کرائم سین کو سیل کر دیا  ہے اور کسی کو گھر کے اندر جانے کی اجازت نہیں دی جا رہی ، دوسری جانب فارنزک ماہرین نےگھر کےدروازے اور دیگر اشیاء  سے فنگر پرنٹس کے نمونےمحفوظ کر کے تجزیے کے لیے بھجوا دیے ہیں جب کہ پولیس نےلاش پوسٹ مارٹم کے بعد ورثاء کے حوالے کردی ہے۔