ٹوکیو اولمپکس میں کھلاڑیوں کے دیے جانے والے میڈلز کیلئے سونا کہاں سے آیا؟

ٹوکیو اولمپکس 2020 کے پہلے روز جیتنے والے کھلاڑیوں کو انعام کی صورت میں میڈلز دیے گئے جس میں چین نے ایونٹ کا پہلا گولڈ میڈل اپنے نام کیا۔

غیر ملکی میڈیا کے مطابق خواتین 10 میٹر ایئر رائفل شوٹنگ مقابلے میں چینی کھلاڑی یانگ کیو ایان نے فائنل میں فتح حاصل کرکے گولڈ میڈل اپنے نام کیا جبکہ مقابلے میں  روسی اولمپک کمیٹی کی ایناستازی نے سلور اور سوئٹزرلینڈ کی نینا کرسٹن نے برانز میڈل حاصل کیا ہے۔

میڈیا رپورٹس کے مطابق شوٹنگ کے مقابلے  آسکا شوٹنگ رینج میں منعقد کیے گئے جہاں اس سے قبل 1964 میں بھی شوٹنگ مقابلے ہوچکے ہیں، کورونا وائرس کی صورتحال کو مد نظر رکھتے ہوئے انٹرنیشنل اولمپکس کمیٹی کے صدر تھامس باخ کی جانب سے فتحیاب کھلاڑیوں کو میڈلز فراہم کیے گئے جو کھلاڑیوں  نے خود کو  پہنائے۔

ٹوکیو اولمپکس: پاکستانی شوٹر گلفام جوزف میڈل کی دوڑ سے باہر

فائنل راؤنڈ کے لیے آٹھ شوٹرز کو کوالیفائی کرنا تھا لیکن پاکستانی شوٹر گلفام جوزف کی مینز 10 میٹر ائیر پسٹل میں نویں پوزیشن رہی۔

اس کے علاوہ دلچسپ بات یہ ہے کہ اولمپکس اور  پیر المپکس میں جیتنے پر کھلاڑیوں کیلئے کم وبیش 5000 میڈلز جاپانی شہریوں کی جانب سے عطیہ کیے گئے 79 ہزار ٹن موبائل فون اور دیگر الیکٹرانک اشیا کی مدد سے بنائے گئے ہیں جسے جاپانی ڈیزائنر کاوانی نے ڈیزائن کیا ہے۔

میڈلز تیار کرنے والوں کو ان برقی آلات سے مطلوبہ مقدار میں سونا، چاندی اور کانسی جمع کرنے میں دو سال کا عرصہ لگا۔

پہلے دن کے مقابلوں کے اختتام پر چین سب سے زیادہ 3 گولڈ میڈلز کے ساتھ سر فہرست ہے۔