04 اگست ، 2021 
کراچی: دن کی روشنی میں ڈکیتی کی خونی واردات، دو افراد ہلاک
04 اگست ، 2021
کراچی شہر میں دن کی روشنی میں ڈکیتی کی خونی واردات ہوئی جس میں مسلح ملزمان نے منی ایکسچینج کی گاڑی پر فائرنگ کی اور رقم لوٹ کر فرار ہوگئے۔
فائرنگ کے نتیجے میں دو ملازمین موقع پر جاں بحق جبکہ ایک زخمی ہو گیا تاہم واردات میں ایک ملازم حیرت انگیز طور پر محفوظ رہا۔
پولیس حکام کے مطابق منی ایکسچینج کی گاڑی میں چار افراد موجود تھے جو آئی آئی چندریگر روڈ سے 6 ہزار ڈالر لے کر نکلے اور بفرزون میں نجی بینک لائے جہاں سے اسے ایکسچینج کر کے 9لاکھ 85ہزار روپے حاصل لیے اور جیسے ہی بینک سے نکلے موٹرسائیکل سوارملزمان ان کے پیچھے لگ گئے۔
بفرزون میں ڈپٹی کمشنر (ڈی سی) آفس سینٹرل رہائشی کالونی کے قریب ملزمان نے گاڑی کو ڈرامائی انداز میں روکا اور دو موٹرسائیکلوں پر سوارملزمان نے تین اطراف سے اندھا دھند فائرنگ کردی جس سے منی ایکسچینج کے دو ملازمین موقع پر ہی جاں بحق ہوگئے جبکہ ایک زخمی ہوا تاہم ایک ملازم معجزانہ طور پر محفوظ رہا۔
ملزمان نے رقم سےبھرا تھیلا لیا اور با آسانی فرار ہوگئے۔ اطلاع ملنے پر پولیس اور رینجرز موقع پر پہنچے اور روایتی طور پر شواہد اکھٹا کیے، حکام کے مطابق منی ایکسچینج انتظامیہ اس گاڑی کو ڈلیوری وین کے طور پر استعمال کرتی ہے۔
