داعش کے حملے کا خطرہ، امریکی شہریوں کو کابل ائیر پورٹ جانے سے روک دیا گیا

افغانستان میں داعش کے حملے کے خطرے کے پیش نظر امریکا نے اپنے شہریوں کے لیے سکیورٹی الرٹ جاری کر دیا ہے۔

امریکا نے سکیورٹی الرٹ جاری کرتے ہوئے شہریوں کو کابل ائیر پورٹ جانے سے منع کر دیا ہے۔ سکیورٹی الرٹ میں کہا گیا ہے کہ ممکنہ طور  پر افغانستان میں موجود داعش کا گروہ حملہ کر سکتا ہے لہٰذا شہری کابل ائیر پورٹ کا رخ نہ کریں۔

امریکی حکام کے مطابق صرف ان امریکیوں کو سفر کرنا چاہیے جنھیں انفرادی طور پر وہاں جانے کو کہا گیا ہے، کابل کی صورتحال کا جائزہ لے رہے ہیں اور متبادل راستوں پر بھی غور کیا جا رہا ہے۔

دوسری جانب برطانوی نشریاتی ادارے کا کہنا ہے کہ امریکا نے کابل ائیر پورٹ پر  داعش کے ممکنہ حملے کے خطرے کی کوئی تفصیل فراہم نہیں کی جبکہ داعش نے بھی کابل میں حملوں کی عوامی سطح پر کوئی دھمکی نہیں دی ہے۔