22 اگست ، 2021 
اساتذہ کی 100 فیصد ویکسینیشن والے اسکول 30 اگست سے کھلیں گے، وزیرتعلیم سندھ کا اعلان
22 اگست ، 2021
صوبہ سندھ کے وزیرتعلیم سید سردارشاہ نے اعلان کیا ہے کہ اساتذہ کی 100 فیصدویکسینیشن والے اسکول 30 اگست سے کھل جائیں گے۔
جیو نیوز کے پروگرام ’نیا پاکستان‘ میں گفتگو کرتے ہوئے سردار شاہ کا کہنا تھاکہ جن اسکولوں کے اساتذہ کی 100 فیصد ویکسینیشن ہوچکی ہے، وہ 30 اگست سے کھلیں گے۔
انہوں نے بتایا کہ دو وجوہات پر اسکولوں کومزید ایک ہفتہ بند رکھنے کا فیصلہ کیا گیاتھا، ایک وجہ اسکولوں کے عملے کا 100 فیصد ویکسین شدہ نہیں ہونا تھا جبکہ پرائیویٹ اسکول کی اپنی رپورٹ میں تھا کہ 73 فیصداسٹاف کی ویکسی نیشن ہوئی۔
ان کا کہنا تھاکہ سرکاری اسکولوں میں ویکسینیشن زیادہ ہوئی اور اس کی وجہ عملے کی تنخواہیں بند کرنا تھا۔
وزیرتعلیم سندھ کا کہنا تھاکہ اسکول بند کرنے کی دوسری وجہ محرم کے بعد کورونا پھیلاو کا خدشہ تھا۔
انہوں نے کہا کہ نجی اسکولوں کی تنظیم سے کل ملاقات کروں گا۔
خیال رہے کہ گزشتہ دنوں ہی وزیراعلیٰ سندھ مراد علی شاہ نے اگلے ہفتے تعلیمی ادارے بند کرنے کا اعلان کیا تھا۔
