28 اگست ، 2021 
ملزمان کی شناخت پریڈ کا معاملہ، ٹک ٹاکر عائشہ طبیعت خراب ہونے پر جیل نہ آسکیں
28 اگست ، 2021
لاہور کے گریٹر اقبال پارک میں خاتون سے دست درازی اور بے لباس کرنے کے کیس میں کیمپ جیل میں زیر حراست ملزمان کی شناخت پریڈ نہ ہوسکی۔
گریٹر اقبال پارک واقعےکے 144ملزموں کی شناخت پریڈ کیلئے جوڈیشل مجسٹریٹ نے 28 اگست کا دن مقرر کررکھا تھا تاہم متاثرہ خاتون عائشہ شناخت پریڈ کیلئے کیمپ جیل نہ پہنچیں۔
ذرائع کے مطابق عائشہ طبیعت کی خرابی کے باعث نہیں آئیں جبکہ جوڈیشل مجسٹریٹ اور سپرنٹنڈنٹ جیل نے کچھ دیر انتظار کیا جس کے بعد جوڈیشل مجسٹریٹ واپس چلے گئے۔
اب عدالت نے ملزمان کی شناخت پریڈ کیلئے یکم ستمبر کی تاریخ مقرر کی ہے اور متاثرہ خاتون عائشہ کو بھی اس روز جیل پہنچنے کی ہدایت کی گئی ہے۔
دوسری جانب گرفتار نوجوانوں کے اہلخانہ بھی کیمپ جیل کے باہر جمع تھے اور انہوں نے شناخت پریڈ نہ ہونے پر احتجاج کیا۔
مظاہرین نے مطالبہ کیا کہ ان کے بچوں کوبلاوجہ گرفتار کیاگیا، انہیں رہا کیا جائے۔
