الیکشن کمیشن کا نوٹس: فواد چوہدری اور اعظم سواتی نے جواب کیلئے مہلت مانگ لی

وفاقی وزرا فوادچوہدری اور اعظم سواتی نے الیکشن کمیشن کو نوٹسز کا جواب دینے کے لیے مہلت مانگ لی۔

دونوں  وزرا نے مہلت دینے کے لیے الیکشن کمیشن میں درخواست بھجوا دی ہے۔

وفاقی وزیراطلاعات فواد چوہدری کے مطابق انہوں نے الیکشن کمیشن کو جواب دینے کے لیے 6 ہفتوں کی مزید مہلت مانگی ہے،فواد چوہدری کی جانب سے ان کے وکیل آفتاب مقصود ہوں گے۔

خیال رہے کہ گزشتہ دنوں الیکٹرانک ووٹنگ مشین کے معاملے پر سینیٹ قائمہ کمیٹی پارلیمانی امور میں وفاقی وزیر اعظم سواتی نے الیکشن کمیشن پر یلغار کردی تھی اور الزام عائد کیا تھا کہ الیکشن کمیشن حکومت کا مذاق اڑا رہا ہے اس نے پیسے پکڑے ہوئے ہیں۔

اس کے بعد وفاقی وزرا نے بھی پریس کانفرنس کی تھی جس میں بھی الزام تراشی کی گئی تھی۔

 الیکشن کمیشن آف پاکستان نے الزام تراشی پر وفاقی وزیر برائے اطلاعات فواد چوہدری اور وزیر ریلوے اعظم سواتی کو 16ستمبر کو نوٹس بھجوائے تھے اور دونوں وزراکو جواب دینے کے لیے7 دن کا وقت دیا تھا۔

ذرائع الیکشن کمیشن کا کہنا ہےکہ وفاقی وزرا کی درخواست ملنے پر مہلت دینے یا نہ دینےکا فیصلہ ہوگا۔