30 ستمبر ، 2021 
شبلی فراز آج بھنگ کی کاشت کے منصوبے کا باضابطہ افتتاح کریں گے
30 ستمبر ، 2021
سرکاری سطح پر انڈسٹریل ہیمپ (بھنگ) کی کاشت کے منصوبے کا آج ( جمعرات) کو باضابطہ افتتاح کیا جا رہا ہے۔
وفاقی وزیر سائنس و ٹیکنالوجی سینیٹر شبلی فراز اس منصوبے کا افتتاح کریں گے، اس منصوبے کو ’ہیمپ ویلیو چین ڈویلپمنٹ پروگرام 2021‘ کا نام دیا گیا ہے۔
انڈسٹریل ہیمپ کی کاشت کی افتتاحی تقریب کا انعقاد روات کے قریب کلیام موڑپر انسٹی ٹیوٹ آف ہائیڈروفونک ایگریکلچر میں کیا گیا ہے۔
پی سی ایس آئی آر حکام کے مطابق اس کے کامیاب تجربے سے پاکستان پرائیویٹ سیکٹر کے ساتھ مل کر مستقبل میں بہت زیادہ فارن ایکسچینج کما سکتا ہے۔
وزارت سائنس و ٹیکنالوجی کی سب سے بڑی ریسرچ آرگنائزیشن پاکستان کونسل آف سائنٹیفک اینڈ انڈسٹریل ریسرچ یہ منصوبہ پیر مہر علی شاہ ایرڈ ایگریکلچر یونیورسٹی کے ساتھ مل کر مکمل کرے گی۔
اس منصوبے کو پی سی ایس آئی آر کا لیڈ پراجیکٹ کہا جا رہا ہے، انڈسٹریل ہیمپ کی کاشت روات کے گرین ہاؤس میں ابتدائی طور پر پانچ ایکڑ اراضی پر کی جائے گی، بھنگ کی کاشت کا نارمل سیزن ختم ہو چکا ہے اسی لیے اس کی ان ڈور کاشت کی جا رہی ہے۔
