علی ظفر کا ہتک عزت کا دعویٰ: میشا شفیع ان کے شوہر اور والدہ عدالت طلب
30 ستمبر ، 2021
لاہور: مقامی عدالت نے علی ظفر کی جانب سے میشا شفیع کے خلاف ہتک عزت کے دعوے پر اداکارہ کو آئندہ سماعت پر طلب کرلیا۔
لاہور کے ایڈیشنل سیشن جج اظہر اقبال نے میشا شفیع کے خلاف علی ظفر کے ہتک عزت کے دعوے پر 29 ستمبر کی سماعت کا تحریری حکم جاری کیا جس میں عدالت نے میشا شفیع، ان کے شوہر اور والدہ صبا حمید کو آئندہ سماعت پر طلب کرلیا۔
عدالت کی جانب سے دو صفحات پر مشتمل تحریری حکم میں کہا گیا ہےکہ ہتک عزت کے دعوے میں میشا شفیع، صبا حمید اور محمد محمود اپنے بیانات ریکارڈ کراچکے ہیں لہٰذا آئندہ سماعت پر تینوں اپنے بیان پر جرح کے لیے پیش ہوں۔
تحریری فیصلے میں کہا گیا ہےکہ علی ظفر کے وکیل کے مطابق تینوں گواہوں کے بیانات پرجرح ہونا باقی ہے۔
عدالت نے کیس کی مزید سماعت 19 اکتوبر تک ملتوی کررکھی ہے۔
