12 اکتوبر ، 2021 
کوبرا سے ڈسوا کر بیوی کو قتل کرنے والا شوہر مجرم قرار
12 اکتوبر ، 2021
دولت ہتھیانے کیلئے سانپ سے ڈسوا کر بیوی کو قتل کرنے والے شوہر کو مجرم قرار دے دیا گیا۔
بھارتی میڈیا کے مطابق ریاست کیرالہ کی ایڈیشنل سیشن کورٹ نے پیر کے روز قتل کیس میں 28 سالہ سورج ایس کمار کو اپنی بیوی کو کوبرا سانپ سے ڈسوا کر قتل کرنے کے الزام میں مجرم قرار دے دیا ۔
بھارتی میڈیا کے مطابق سزا کا اعلان 13 اکتوبر کو کیا جائے گا جبکہ استغاثہ نے عدالت سے اپیل کی کہ ملزم کو سزائے موت دی جائے کیونکہ جرم شیطانی نوعیت کا ہے۔
واضح رہے کہ یہ واقعہ7 مئی 2020 کا ہے جب اتھرا نامی خاتون کیرالہ کے ضلع کولام میں اپنے گھر میں سانپ کے کاٹنے کی وجہ سے مردہ پائی گئی تھی جس کے بعد شک کی بنیاد پر اس کے شوہر کو گرفتار کیا گیا تھا۔
پولیس کا کہنا تھا کہ ملزم کے موبائل فون کے ریکارڈ سے پتا چلا کہ وہ سپیروں سے رابطے میں تھا اور اس نے بیوی کی جان لینے سے پہلے انٹرنیٹ پر سانپوں کی ویڈیوز بھی دیکھی تھیں۔
پولیس نے ملزم کو سانپ دینے والے سپیرے کو بھی گرفتار کرلیا تھا۔
پولیس نے بتایا کہ لڑکی کا تعلق ایک امیر گھرانے سے تھا اور اس کا شوہر نجی بینک میں ملازم تھا جس کا ذریعہ آمدن کچھ خاص نہیں تھا جب کہ ان کا2 سال کا بیٹا بھی ہے۔
پولیس کے مطابق سورج اور اتھرا کی شادی میں بھاری بھرکم جہیز، 100 تولے سونا، ایک گاڑی اور 5 لاکھ روپے دیے گئے تھے جس پر شوہر کو ڈر تھا کہ طلاق کی صورت میں اس کی بیوی سب کچھ ساتھ لے جائے گی جس کے باعث اس نے بیوی کی جان لے لی۔
مزید خبریں :
دنیا بھر میں کرسمس تقریبات کا آغاز،گرجا گھروں میں خصوصی عبادات
25 دسمبر ، 2024
شام کے شہر حماہ میں نامعلوم افراد نےکرسمس ٹری کو آگ لگادی
24 دسمبر ، 2024
