انٹرٹینمنٹ

آریان خان کا جیل میں کھانے پینے سے گریز

13 اکتوبر ، 2021

آریان جیل میں ٹوائلٹ جانے کے خوف سے نہ کچھ کھارہے ہیں اور نہ پی رہے ہیں: بھارتی میڈیا/ فائل فوٹو

منشیات کیس میں گرفتار شاہ رخ خان کے بیٹے آریان خان جیل میں ٹوائلٹ جانے سے بچنے کے لیے ٹھیک طرح سے کھانے پینے سے بھی گریز کررہے ہیں۔

بھارتی میڈیا رپورٹس کے مطابق آریان خان کو جیل میں کافی مشکلات کا سامنا ہے اور جیل قواعد کے مطابق انہیں نئے قرنطینہ سیل میں رکھا گیا ہے لیکن وہ اس مشکل وقت میں جیل کے ٹوائلٹ استعمال کرنے سے کترارہے ہیں۔

بھارتی میڈیا کا کہنا ہےکہ آریان جیل میں ٹوائلٹ جانے کے خوف سے نہ کچھ کھارہے ہیں اور نہ پی رہے ہیں، جیل حکام اور انتظامیہ اس حوالے سے خاصے فکر مند ہیں اور انہیں عملے کی جانب سےباقاعدگی سے کھانے اور پینے کے حوالے سے کہا جارہا ہے۔

یہ بھی پڑھیں

دوسری جانب بھارتی میڈیا کا بتانا ہےکہ شاہ رخ خان بھی آریان خان کی صحت کے حوالے سے خاصے پریشان ہیں، دن بھر میں شاہ رخ کی جانب سے انتظامیہ کو آریان کی صحت جاننے کے لیے کئی فون کیے جاتے ہیں۔

بھارتی میڈیا کے مطابق شاہ رخ بیٹے کی گرفتاری کےبعد سے خود بھی صحت کے مسائل سے دوچار ہیں۔

علاوہ ازیں بھارتی میڈیا کی حالیہ رپورٹ میں یہ بھی بتایا گیا ہے کہ آریان خان نے جیل کا کھانا کھانے سے صاف انکار کردیا ہے اور فی الحال وہ بسکٹس کھانے کے طور پر کھا رہے ہیں۔

واضح رہے کہ اس سے قبل آریان خان کی جیل میں گزارے جانے والی زندگی سے متعلق تفصیلات سامنے آئی تھیں جس میں بتایا گیا تھا کہ انہیں صبح 6 بجے اٹھا کر 7 بجے ناشتہ دیا جاتا ہے جب کہ دوپہر کا کھانا 11 بجے دیا جاتا ہے جس میں دال چاول شامل ہیں۔