آریان نے منشیات لانے کیلئے کون سا ’کوڈ ورڈ‘ استعمال کیا تھا؟

کروز منشیات کیس میں گرفتار آریان خان کا منشیات کے حوالے سے کوڈ ورڈ بھی سامنے آ گیا۔

آریان خان ضمانت مسترد ہونے پر ممبئی کی آرتھر روڈ جیل میں 14 دن کی عدالتی تحویل میں ہیں۔

درخواست ضمانت کی سماعت کے دوران ایڈیشنل سالیسیٹر جنرل انیل سنگھ نے آریان کی واٹس ایپ چیٹ کے حوالے سے ایک بڑا انکشاف کیا۔

انیل سنگھ نے عدالت کو بتایا کہ منشیات کی فراہمی کے الزام میں گرفتار آریان اور اچت کمار کی بات چیت نارکورٹس کنٹرول بیورو (این سی بی) کے پاس ہے اور اس میں آریان اس سے کوڈ ورڈ میں 'فٹ بال' لانے کو کہہ رہا ہے۔

این سی بی کے مطابق اچت کمار منشیات فروش ہے جسے آریان خان اور ارباز مرچنٹ کے کہنے پر پوائی علاقے سے گرفتار کیا ہے۔

این سی بی نے 'فٹ بال' کا کیا مطلب بتایا؟

کوڈ ورڈ 'فٹ بال' کے معنی کو این سی بی کی جانب سے انیل سنگھ نے عدالت میں ظاہر کیا اور بتایا کہ این سی بی کو شبہ ہے کہ 'فٹ بال' کا مطلب 'بڑی مقدار' میں منشیات ہے۔

تاہم اس کے ساتھ ہی انہوں نے کہا کہ وہ اس طرح کے کوڈ ورڈز کے بارے میں کھلی عدالت میں مزید بات نہیں کرنا چاہتے۔

دیپیکاپڈوکون کے کوڈ ورڈز

اداکار سشانت سنگھ راجپوت خودکشی کیس میں منشیات کا زاویہ سامنے آنے کے بعد اداکارہ دیپیکا پڈوکون کی ایک چیٹ بھی لیک ہوگئی تھی۔

لیک چیٹ میں 'ہیش' اور 'ویڈ' جیسے کوڈ ورڈ استعمال کیے گئے۔ این سی بی کے مطابق اس کا مطلب 'چرس' اور 'گانجا' تھا۔ اس معاملے میں دیپیکا کی منیجر کرشمہ پرکاش سے بھی این سی بی نے گھنٹوں پوچھ گچھ کی تھی۔

دیپیکا کو بھی این سی بی آفس بلایا گیا تھا جہاں انہوں نے کہا تھا کہ وہ ’بڑے سگریٹ‘ اور ’چھوٹے سگریٹ‘ کے بارے میں بات کر رہی ہیں۔