انٹرٹینمنٹ

آریان خان منشیات کیس، شاہ رخ خان کیلئے اچھی خبر سامنے آگئی

13 اکتوبر ، 2021

ضمانت کا فیصلہ نہ ہونے پر اب آریان کوآج کی رات بھی ممبئی کی سینٹرل جیل میں بسر کرنی ہوگی— فوٹو:فائل

بالی وڈ اداکار شاہ رخ خان کے بیٹے آریان خان کو منشیات کیس میں آج بھی ضمانت نہ مل سکی تاہم شاہ رخ خان کیلئے اچھی خبر یہ ہے کہ نارکوٹکس کنٹرول بیورو (این سی بی) نے اعتراف کیا ہے کہ آریان خان سے کوئی برآمدگی نہیں ہوئی ہے۔

بھارتی میڈیا رپورٹس کے مطابق آریان خان سمیت دیگر ملزمان کی ضمانت کی درخواستوں پر اسپیشل کورٹ میں سماعت ہوئی۔

رپورٹس میں کہا گیا ہے کہ نارکوٹکس کنٹرول بیورو (این سی بی) نے کیس سے متعلق جواب عدالت میں جمع کرایا جس میں اعتراف کیا گیا ہے کہ آریان خان کے پاس سے کوئی برآمدگی نہیں ہوئی ہے۔

یہ بھی پڑھیں

تاہم این سی بی نے آریان کی ضمانت کی مخالفت کرتے ہوئے کہا کہ ملزمان کے کردار کو ایک دوسرے سے الگ نہیں کیا جاسکتا، آریان سے برآمدگی نہ ہونے کے باوجود وہ اس پورے معاملے میں شامل ہے۔

این سی بی نے آریان کا کیس بھی دیگر ملزمان سے الگ کرنے کی مخالفت کی اور کہا کہ آریان ایک بااثر شخص ہے جو ثبوتوں کے ساتھ چھیڑ چھاڑ کرسکتے ہیں، یہ بھی صاف ہے کہ اچت کمار اور شیو راج نے آریان اور ارباز کو چرس سپلائی کی، یہ سب ملزمان ایک دوسرے سے جڑے ہوئے ہیں۔

نارکوٹکس ایجنسی نے آریان پر انٹرنیشنل ڈرگز ڈیلر سے رابطوں کا بھی الزام لگایا۔

دوران سماعت آریان کے وکیل امیت دیسائی نے بھی دلائل دیے تاہم عدالت نے سماعت مقامی وقت کے مطابق کل 12 بجے تک ملتوی کردی۔

ضمانت کا فیصلہ نہ ہونے پر اب آریان کوآج کی رات بھی ممبئی کی سینٹرل جیل میں بسر کرنی ہوگی۔

خیال رہے کہ این سی بی نے 2 اکتوبر کی رات ممبئی کے ساحل پر ایک کروز شپ پر ہونے والی پارٹی پر چھاپہ مار کر شاہ رخ کے بیٹے سمیت 8 افراد کو گرفتار کیا تھا۔