20 اکتوبر ، 2021 
امیتابھ بچن نے 13 سال بعد بیٹی کو ناراض باپ سے ملوادیا
20 اکتوبر ، 2021
بالی وڈ شہنشاہ امیتابھ بچن نے اپنے پروگرام ’کون بنے گا کروڑ پتی‘ میں ایک بیٹی کو 13 سال بعد اپنے ناراض باپ سے ملوادیا۔
بھارتی میڈیا رپورٹس کے مطابق کون بنے گا کروڑ پتی کے 13 ویں سیزن میں پیر کے روز نشر ہونے والی قسط میں ریاست مہاراشٹرا سے تعلق رکھنے والی خاتون بھاگیاشری نے بتایا کہ ان کے والد پسند کی شادی کرنے کے بعد سے ناراض ہیں۔
بھاگیاشری کا کہنا تھا کہ شادی کو 13 سال کا عرصہ ہوجانے کے بعد بھی والد نے ان سے رابطہ نہیں کیا، نا ہی ان سے ملاقات ہوئی جب کہ ان کے والد نے ان کی ننھی بیٹی کو بھی نہیں دیکھا۔
میڈیا رپورٹس کے مطابق پروگرام کے دوران اپنی زندگی کا احوال بتاتے ہوئے خاتون جذباتی ہوگئیں اور پھوٹ پھوٹ کر رودیں۔
انہوں نے اپنے والد سے معافی بھی مانگی جس پر امیتابھ نے کہا کہ آپ کے والد فون کال پر ہیں اور آپ سے بات کرنا چاہتے ہیں، یہ سن کر خاتون خوشی سے پھولے نہ سمائیں۔
بھاگیاشری نے کون بنے گا کروڑ پتی میں ساڑھے 12 لاکھ روپے کی رقم جیتی، انہوں نے 25 لاکھ کے سوال کا جواب نہ دے پانے کی وجہ سے مقابلہ وہیں ختم کرنے کا فیصلہ کیا تھا۔
مزید خبریں :
سوناکشی کو کس اداکار نے بڑی عمر کا کہہ کر فلم سے نکلوایا تھا؟
20 دسمبر ، 2024
