22 اکتوبر ، 2021 
اسلام آباد کے پمز اسپتال میں ہائی الرٹ کردیا گیا
22 اکتوبر ، 2021
وفاقی دارالحکومت اسلام آباد کی ضلعی انتظامیہ کی ہدایت پر پاکستان انسٹیٹیوٹ آف میڈیکل سائنسز ( پمز) اسپتال کو ہائی الرٹ کردیا گیا۔
پمز اسپتال کی ایمرجنسی سے متعلقہ وارڈز کو سرکلر جاری کردیا گیا ہے جس میں کہا گیا ہے کہ کسی بھی ہنگامی صورتحال سے نمٹنے کیلئے ضروری انتظامات کیے جائیں۔
سرکلر میں ایمرجنسی اسٹاف کو حاضری یقینی بنانے کی ہدایت کی گئی ہے۔
خیال رہے کہ کالعدم تنظیم تحریک لبیک پاکستان (ٹی ایل پی) کی جانب سے اسلام آباد کی طرف لانگ مارچ شروع کردیا گیا ہے جس کے پیش نظر راولپنڈی میں سکیورٹی کے سخت انتظامات کیے گئے ہیں۔
اندرون شہر بیشتر راستے بند کردیے گئے ہیں، سکستھ روڈ پر کنٹینرز لگا کر فیض آباد کی طرف جانے والا راستہ بند کردیا گیا ہے، فیض آباد اوجڑی کیمپ کی روڈ کو بھی بند کرکے سیل کر دیا گیا ہے۔
