03 نومبر ، 2021 
نسلہ ٹاور کو بارود سے گرانے کیلئے کمپنی نے پیشکش کردی
03 نومبر ، 2021
کراچی: سپریم کورٹ کے حکم کی روشنی میں چار کمپنیاں نسلہ ٹاور گرانے کے لیے میدان میں آگئیں۔
ذرائع کے مطابق نسلہ ٹاور کو گرانے کے لیے چار میں سے صرف ایک کمپنی نے دھماکا خیز مواد استعمال کرنے کی پیشکش کی ہے جو ہائی ٹیک الیکٹرانکس اینڈ مشینری کمپنی کی جانب سے کی گئی ہے۔
کراچی کی ہائی ٹیک الیکٹرانکس نے غیر ملکی کمپنیوں کے اشتراک سے نسلہ ٹاور کو گرانے پر آمادگی ظاہر کی ہے۔
ذرائع کے مطابق تین دیگر نجی کمپنیوں نے مشینوں اور افرادی قوت کی مدد سے عمارت گرانے کیلئے آمادگی ظاہر کی ہے، ان کمپنیوں میں اے این آئی ایکسپرٹ ڈینجرس بلڈنگز ناظم آباد، ڈبل اے ڈیمولیشن سینٹر فیصل ٹاؤن لاہور اور میر انٹرپرائز نامی کمپنی نے ای میل کے ذریعے شہری انتظامیہ کو ڈیمولیشن کی آفر کی۔
ذرائع کا بتانا ہےکہ کمپنیوں کو اپنی تحریری آفرز کے ذریعے اجلاس میں بلوایا گیا ہے اور تمام کمپنیوں کی آفرز کو آج ہونے والے اہم اجلاس میں زیر غور لایا جائے گا۔
