08 نومبر ، 2021
ٹی ٹوئنٹی ورلڈکپ میں بھارت کی ناقص کارکردگی اور سیمی فائنل میں نہ پہنچنے پر بھارت کے سابق کرکٹرز نے اپنی توپوں کا رخ ٹیم اور انڈین پریمیئر لیگ (آئی پی ایل) کی جانب کرلیا۔
سابق بھارتی کرکٹر وریندر سہواگ نے اپنے ٹوئٹر اکاؤنٹ پر بھارتی سیاستدان راہول گاندھی کی ایک تصویر شیئر کی جس کے کیپشن میں لکھا تھا ’ختم بائے بائے ٹاٹا گڈ بائے‘۔
دوسری جانب سابق بھارتی کپتان کپل دیو نے بھی اپنی ٹیم کی پے در پے شکست اور ورلڈکپ کی دوڑ سے باہر ہونے پر شدید غصے کا اظہار کیا۔
ایک انٹرویو کے دوران کپل دیو نے کھلاڑیوں کے آئی پی ایل میں کھیلنے کو بھارتی ٹیم کی شکست کی وجہ قرار دیتے ہوئے کہا کہ جب کھلاڑی قومی سطح پر کھیلنے کی بجائے آئی پی ایل کو ترجیح دیں گے تو ہم کیا کہہ سکتے ہیں؟
انہوں نے کہا کہ کھلاڑیوں کو اپنی قوم کے لیے کھیلنے پر فخر کرنا چاہیے، میں ان کے مالی حالات نہیں جانتا اس لیے زیادہ کچھ نہیں کہوں گا، پہلے قومی ٹیم اور پھر کوئی بھی فرنچائزز ہونی چاہیے، ورلڈکپ میں بھارتی ٹیم نے جو غلطیاں کی ہیں اسے نہ دہرانہ ہی اصل سبق ہے۔
کپل دیو کا کہنا تھا کہ مجھے لگتا ہے کہ آئی پی ایل اور ورلڈکپ کے درمیان کچھ فرق ہونا چاہیے تھا۔