27 دسمبر ، 2021 
حلف نامے پر دستخط کے وقت رانا شمیم اکیلے تھے، لندن کے اوتھ کمشنر کی تصدیق
27 دسمبر ، 2021
لندن میں سپریم ایپلٹ کورٹ گلگت بلتستان کے سابق چیف جج رانا شمیم کے حلف نامے کی تصدیق کرنے والے وکیل اوتھ کمشنر اور نوٹری پبلک نے ایک بار پھر تصدیق کی ہے کہ حلف نامے پر دستخط کے وقت رانا شمیم اکیلے تھے اور انہوں نے تمام قانونی تقاضے پورے کیے۔
لندن کے اوتھ کمشنر کا کہنا تھاکہ یہ سچی اور اصلی دستاویز ہے جو مؤثر طریقے سے مجھے دیا گیا تھا، جس شخص نے مجھ سے بنایا، اس نے پاسپورٹ اور شناختی کارڈ دکھایا تھا اور یہ آزادنہ طورپر بنایا گیا تھا۔
ان کا کہنا تھاکہ حلف نامے کی تصدیق کیلئے کہیں بھی پیش ہونے کو تیار ہوں۔
اوتھ کمشنر کا کہنا تھاکہ رانا شمیم نے جب حلف نامہ دیا تو وہ کمرے میں اکیلے تھے۔
انہوں نے جسٹس (ر) رانا شمیم کے حلف نامے کی اشاعت کے بعد دی نیوز کے ساتھ اپنے دو انٹرویوز کے علاوہ کسی بھی سرکاری بیان یا کسی بھی میڈیا آؤٹ لیٹ کو انٹرویو دینے کی سختی سے تردید بھی کی۔
خیال رہے کہ گزشتہ روز وزیر اطلاعات فواد چوہدری نے میڈیا رپورٹس کا حوالہ دیتے ہوئے کہا تھا کہ سابق چیف جج رانا شمیم نے اپنا حلف نامہ نوازشریف کے سامنے نوٹرائز کرایا، ثابت ہوگیا کہ شریف فیملی سیسیلین مافیا ہے۔
