ایونٹ کے دوران کورونا پھیلا تو پی ایس ایل 7 روز کیلئے معطل ہو گا، پروٹوکولز طے

کورونا کی تازہ لہر کے پیش نظر رواں ماہ شیڈول پاکستان سپر لیگ (پی ایس ایل)کے ساتویں ایڈیشن کیلئے پروٹوکولز طے کرلیے گئے۔

ذرائع کے مطابق پی ایس ایل سے وابستہ افراد کیلئے 3 روز کا قرنطینہ لازمی قرار دیا گیا ہے جبکہ  ملکی اور غیر ملکی افراد 20 جنوری سے قرنطینہ میں داخل ہو جائیں گے، کووڈ مثبت آنے کی صورت میں متاثرہ شخص کیلئے 10 روز کی آئسولیشن لازمی ہوگی۔

ذرائع کے مطابق پی ایس ایل کے دوران کھلاڑیوں کی فیملیز کو ساتھ رہنے کی اجازت نہیں ہوگی۔

پاکستان سپر لیگ 7 کے شیڈول کا اعلان کردیا گیا، پہلا میچ کراچی اور ملتان کا ہوگا

پی سی بی کے مطابق پی ایس ایل 7 کا آغاز 27 جنوری سے ہوگا ، ایونٹ کے 15 میچز کراچی جبکہ 19 میچز لاہور میں کھیلے جائیں گے

ذرائع کے مطابق میچ کے انعقاد کیلئے 13 کھلاڑیوں کا دستیاب ہونا لازمی ہوگا، 13 سے کم کھلاڑی دستیاب ہوئے تو میچ ممکن نہیں ہو گا۔

ذرائع کے مطابق ایونٹ کے دوران کورونا پھیلنے کی صورت میں ایونٹ 7 روز کیلئے معطل ہو گا جسے ری شیڈول کیا جائے گا۔

ذرائع کا کہنا ہے کہ پی ایس ایل کیلئے 24 کھلاڑیوں کا ریزرو  پول تیار ہوگا، ریزرو پول 20 جنوری سے ہی قرنطینہ میں داخل ہو جائے گا،  اس ریزرو پول سے ضرورت پڑنے پر کھلاڑیوں کو لیا جا سکے گا، یہ ریزرو  پول مقامی کھلاڑیوں پر مشتمل ہو گا۔

ذرائع کے مطابق پاکستان کرکٹ بورڈ نے فی الحال 27 فروری تک ہی ایونٹ ختم کرنے کی حکمت عملی بنائی ہے۔