پاکستان
19 جنوری ، 2022

ویڈیو: رشتے داروں سے ملنے آئی خاتون پر شوہر کے سامنے تشدد اور بدسلوکی

 آزاد کشمیر کے  شہر  مظفرآباد میں رشتے داروں سے ملنے  آنے والے میاں بیوی کو زد وکوب کرنے  اور  ان  کے ساتھ بدسلوکی کے واقعے کی ویڈیو سوشل میڈیا پر وائرل ہے۔

پولیس کے مطابق ملزمان  نے خاتون سے بدسلوکی کرتے ہوئے موبائل اور  رقم کا تقاضہ کیا جبکہ خاتون کے  شوہر  پر بھی تشدد  کیا۔

بعد ازاں ملزمان نے واقعے کی ویڈیو سوشل میڈیا پر خود وائرل کر دی، ویڈیو وائرل ہونے پر پولیس نے 3 ملزمان کو گرفتار کرکے مقدمہ درج کر لیا۔

پولیس کے مطابق میاں بیوی سے بدسلوکی کا واقعہ ایک ہفتے قبل پیش آیا جس کے بعد   سوشل میڈیا پر وائرل ہونے والی ویڈیو  پر انسپکٹر جنرل ( آئی جی )  آزاد کشمیر سہیل تاجک نے خود نوٹس لیا۔

وائرل ویڈیو میں کیا دیکھا گیا؟

 وائرل  ویڈیو میں دیکھا جاسکتا ہے کہ کچھ افراد مظفرآباد کے علاقے لنگر پورہ سیٹلائٹ ٹاؤن میں گاڑی میں سوار شخص اور خاتون کو زد وکوب کر رہے ہیں، ملزمان گاڑی  سوار شخص کو کھینچ کر گاڑی سے باہر نکال رہے ہیں اور مزاحمت پر اسے زدوکوب کرتے ہوئے گالیاں بھی دے رہے ہیں۔

ویڈیو میں دیکھا جاسکتا ہے کہ ایک ملزم نے تو گاڑی میں بیٹھتے ہوئے خاتون کو تھپڑ بھی دے مارا،  موبائل فون اور پیسے مانگتے ہوئے خاتون سے بدتمیزی بھی کی، خاتون گاڑی سے نکلتی ہے تو اسے دوسرا ملزم واپس بٹھاکر بدسلوکی کرتا دکھائی دیتا ہے۔

دوسری جانب ویڈیو میں متاثرہ  شخص ملزمان سے بار بار کہہ رہا ہے کہ پیسے دینے کو تیار ہیں لیکن ملزمان نہیں مانتے۔

 پولیس کے مطابق  ملزمان نے خود سوشل میڈیا پر ویڈیو وائرل کی،  ویڈیو کے ذریعے تین ملزمان کو شناخت کرکے گرفتار کرکے سٹی تھانہ مظفرآباد میں مقدمہ درج کرلیا گیا ہے تاہم بدسلوکی کے واقعے سے متعلق مزید تفتیش کی جا رہی ہے۔

 مقامی لوگوں کے مطابق متاثرہ شخص اور خاتون کا تعلق پنجاب سے اور  وہ اپنے رشتے داروں کے ہاں لنگر پور ہ آئے ہوئے تھے۔

مزید خبریں :

Notification Management


پاکستان
دنیا
کاروبار
کھیل
انٹرٹینمنٹ
صحت و سائنس
دلچسپ و عجیب

ڈیسک ٹاپ نوٹیفکیشن کے لیے سبسکرائب کریں
Powered by IMM