آسٹریلین ریاستوں کا اسکولوں میں طلبہ کے ہفتے میں 2 کورونا ٹیسٹ کرانےکا اعلان
23 جنوری ، 2022
آسٹریلیا میں بڑھتے کورونا کیسز کے سبب دو ریاستوں نے اسکولوں میں طلبہ کےہفتے میں دو کورونا ٹیسٹ کرانےکا اعلان کیا ہے۔
خبر ایجنسی کے مطابق نیوساؤتھ ویلز اور وکٹوریا میں اگلے ہفتے سے اسکول کی کلاسز میں کورونا ٹیسٹنگ ہو گی۔
رپورٹ کے مطابق آسٹریلیا بھر میں کورونا وائرس سے آج بھی 58 اموات رپورٹ ہوئی ہیں، ریاست نیوساؤتھ ویلز میں 34، وکٹوریا میں 14 اور کوئنزلینڈ میں کورونا سے 10 اموات ہوئیں۔
طبی ماہرین کا کہنا ہے کہ نیوساؤتھ ویلز اور وکٹوریا میں اومی کرون ویرینٹ کی وبا عروج پر ہے، نیوساؤتھ ویلز میں کورونا کے 20 ہزار 324 کیسز اور وکٹوریا میں 13 ہزار کیسز رپورٹ ہوئے ہیں۔
واضح رہے کہ آسٹریلیا میں موسم گرما کی چھٹیوں کے بعد اگلے ہفتے سے اسکولوں میں کلاسز شروع ہونی ہیں۔
