ویڈیو: شہناز اور سلمان سدھارتھ کی یاد میں ایک دوسرے سے مل کر رو پڑے
29 جنوری ، 2022
بھارت کے نامور رئیلٹی شو بگ باس سیزن 15 کے گرینڈ فنالے کا ایک پرومو سامنے آیا ہے جس میں شو کے میزبان سلمان خان اور اداکارہ شہناز گل آنجہانی اداکار سدھارتھ شکلا کو یاد کر کے رو پڑتے ہیں۔
بگ باس کا فائنل آج اور کل دکھایا جائے گا جس میں شہناز گل اپنے ساتھی اور بگ باس 13 کے فاتح امید وار سدھارتھ شکلا کو خراجِ تحسین پیش کریں گی۔
ویڈیو میں دیکھا گیا کہ شہناز گل کو اداکار سلمان خان اسٹیج پر آنے کی دعوت دیتے ہیں، شہناز جیسے ہی اسٹیج پر آتی ہیں تو ان کے آنسو چھلک پڑتے ہیں جس پر سلمان فوراً انہیں گلے لگالیتے ہیں۔
بگ باس کے فائنل کا یہ پرومو سوشل میڈیا پر زیرِ گردش ہے جس پر صارفین بھی آبدیدہ نظر آئے اور سدھارتھ کے لیے شہناز کی محبت کی مثالیں دیں۔
خیال رہے کہ بگ باس کے سیزن 13 کے فاتح سدھارتھ شُکلا 40 برس کی عمر میں 2 ستمبر 2021 کو اچانک دل کا دورہ پڑنے کے باعث چل بسے تھے۔
