نورا فتیحی کا 37 ملین سے زائد فالورز کا انسٹاگرام اکاؤنٹ ڈیلیٹ، صارفین حیران

کینیڈین نژاد بھارتی اداکارہ اور ماڈل نورا فتیحی کا 37 ملین سے زائد فالوورز کا انسٹاگرام اکاؤنٹ اب سوشل میڈیا ایپلیکیشن پر موجود نہیں ہے۔

بھارتی میڈیا رپورٹس کے مطابق بظاہر لگ رہا ہے کہ اداکارہ نے اپنا انسٹا گرام اکاؤنٹ ڈیلیٹ کردیا ہے۔

انسٹاگرام پر ہمیشہ فعال رہنے والی نورا کے مداح جمعے کی شام کو حیران رہ  گئے جب اداکارہ کا انسٹاگرام اکاؤنٹ سرچ کرنے کے باوجود انہیں نہیں ملا۔

تاہم اداکارہ کی جانب سے اپنے انسٹاگرام اکاؤنٹ ڈیلیٹ کرنے کے حوالے  سے اب تک کوئی باضابطہ بیان سامنے نہیں آیا۔

واضح رہے کہ نورا نے گزشتہ روز ہی دبئی میں اپنی چھٹیاں منانے کی تصاویر شیئر کی تھیں، جس میں انہیں شیروں کے ساتھ دیکھا گیا تھا۔

خیال کیا جارہا ہے کہ ادکارہ نے سوشل میڈیا سے کچھ دیر کے لیے دوری اختیار کرلی ہے ، یہ پہلی بار نہیں کے بالی وڈ اسٹارز نے سوشل میڈیا سے دور رہنے کا فیصلہ کیا ہو۔

اس سے قبل عامر خان اور  جان ابراہم بھی سوشل میڈیا سے دوری اختیار کرچکے ہیں۔