16 فروری ، 2022 
شوہر سے علیحدگی: راکھی غلطی کا اعتراف کرتے ہوئے رو پڑیں
16 فروری ، 2022
بھارتی اداکارہ راکھی ساونت نے شوہر رتیش سے علیحدگی میں اپنی غلطی کا اعتراف کیا ہے۔
بھارتی میڈیا کے سوشل میڈیا اکاؤنٹ پر راکھی کی ایک ویڈیو شیئر کی گئی ہے جس میں انہیں سابق شوہر رتیش کے لیے اداس ہوتے اور ان سے محبت کا اعتراف کرتے دیکھا جاسکتا ہے۔
راکھی کا کہنا تھا کہ میں کمزور نہیں ہوں لیکن میں رتیش سے محبت کرتی ہوں ،میرا دل تمہارے لیے دھڑکتا ہے۔
اس موقع پر راکھی نے روتے ہوئے معافی مانگی اور اعتراف بھی کیا کہ غلطی ان کی ہے لیکن وہ اپنے سابق شوہر رتیش پر کوئی الزام نہیں لگائیں گی۔
راکھی کا کہنا تھا کہ وہ نہیں چاہتیں کہ کسی کے والدین تھانہ کچہری میں جائیں۔
اس دوران راکھی نے یہ بھی بتایا کہ وہ ڈپریشن کا شکار ہیں جس سے نجات کے لیے گزشتہ روز ڈائٹ پر ہونے کے باوجود میٹھی چیزوں کا استعمال کیا۔
خیال رہے کہ گزشتہ کچھ روز سے راکھی اور رتیش کے حوالے سے خبریں سرگرم تھیں کہ دونوں کا ازدواجی تعلق مسائل کا شکار ہے اور وہ اب ساتھ نہیں جس کے بعد راکھی نے خود دو روز قبل شوہر سے علیحدگی کی تصدیق کی۔
