28 فروری ، 2022 
روس کا جوابی اقدام، جرمنی اور برطانیہ سمیت 36 ممالک کیلئے فضائی حدود بند کردی
28 فروری ، 2022
روس نے جوابی اقدام کرتے ہوئے برطانیہ اور جرمنی سمیت 36 ممالک کیلئے اپنی فضائی حدود استعمال کرنے پر پابندی لگا دی۔
روس نے 24 فروری کو پڑوسی ملک یوکرین پر حملہ کیا تھا جس کے بعد سے اب تک دارالحکومت کیف سمیت کئی شہروں میں جنگ جاری ہے۔
روس کے حملے کے بعد امریکا اور یورپی ممالک نے روس پر مالی پابندیاں عائد کردی ہیں جبکہ متعدد ممالک نے روسی ائیرلائنز کو ملکی فضائی حدود کے استعمال سے روک دیا تھا۔
اب روس نے بھی جوابی اقدام کرتے ہوئے 36 ممالک کی ائیرلائنز پر روس کی فضائی حدود استعمال کرنے پر پابندی عائد کردی ہے۔
روس کی جانب سے پابندی کا شکار ہونے والے ممالک میں برطانیہ، جرمنی، اٹلی ، اسپین اور کینیڈا سمیت دیگر شامل ہیں۔
خیال رہے کہ یوکرین پر حملے کے بعد یورپی یونین نے روسی ائیرلائنز پر فضائی حدود استعمال کرنے پر پابندی لگائی تھی۔
