سجل اور احد کی مبینہ طلاق کے بعد احد کی والدہ کی چیٹ لیک

اداکارہ سجل علی اور احد رضا میر کی علیحدگی کی خبروں کے بعد اب احد کی والدہ ثمرہ رضا میر کی چیٹ کا اسکرین شاٹ منظرِ عام پر آیا ہے۔

گزشتہ کئی روز سے شوبز کی دنیا میں اداکار جوڑے کی طلاق سے متعلق خبریں سرگرم ہیں، متعدد اداکاروں نے بھی دونوں کے لیے نیک خواہشات کا اظہار کیا لیکن سجل اور احد سمیت ان کے گھر والوں کی جانب سے کوئی ردعمل سامنے نہیں آیا۔

حال ہی میں احد رضا میر کے انسٹاگرام پر موجود فین پیج کی جانب سے ایک پوسٹ شیئر کی گئی جس میں اداکار کی والدہ ثمرہ رضا کی چیٹ کا اسکرین شاٹ موجود تھا۔

چیٹ میں انہوں نے طلاق کی خبروں سے متعلق لکھا تھا کہ 'آپ ان دونوں کے لیے دعا کرو، آپ کی محبت کا شکریہ'۔

مذکورہ پوسٹ پر اکاؤنٹ نے سجل علی اور احد رضا میر سمیت ثمرہ رضا کو بھی ٹیگ کیا۔

اسی پوسٹ پر ایک صارف نے تبصرہ کیا اور پوچھا یہ چیٹ کب کی ہے، جس پر جواب دیا گیا کہ  اسکرین شاٹ گزشتہ روز  کا ہے جب کہ ایک اور صارف نے کہا کہ یہ خاتون کون ہیں جس پر ایک مداح نے بتایا کہ یہ احد کی والدہ ہیں۔

وائرل اسکرین شاٹ پر مداحوں کی جانب سے نیک خواہشات کا اظہار کیا جارہا ہے اور امید ظاہر کی جارہی ہے کہ جلد دونوں میں اختلافات ختم ہوجائیں۔

واضح رہے کہ گزشتہ ہفتے شوبز سے منسلک معروف صحافی آمنہ عیسانی نے باوثوق ذرائع کا حوالہ دیتے ہوئے انکشاف کیا تھا کہ سجل اور احد کی طلاق کی تصدیق ہوچکی ہے جب کہ اس سے قبل کئی عرصے سے دونو ں کی علیحدگی سے متعلق دعوے کیے جارہے تھے۔