06 اپریل ، 2022 
فرح خان اور خاتون اول پر لگائے جانیوالے الزامات پر عثمان بزدار کا ردعمل سامنے آگیا
06 اپریل ، 2022
سابق وزیر اعلیٰ عثمان بزدار نے خاتون اول بشریٰ بی بی اور ان کی قریبی ساتھی فرح خان پر تحریک انصاف کے منحرف رہنما عبد العلیم خان کے الزامات پر ردعمل دیا ہے۔
ٹوئٹر پر اپنے بیان میں عثمان بزدار نے کہا کہ خاتون اول اور فرح خان کے بارے میں بے بنیاد الزامات کو قطعی طور پر مسترد کرتا ہوں۔
انہوں نے لکھا کہ علیم خان، چوہدری سرور اور دیگر اپوزیشن ارکان کے من گھڑت الزامات کی سختی سے تردید کرتا ہوں اور بلا ثبوت الزام تراشی کی مذمت کرتا ہوں۔
انہوں نے یہ بھی کہا کہ پنجاب میں تقرر و تبادلے میرٹ اور قواعد و ضوابط کے مطابق ہوتے ہیں۔
یاد رہے کہ پنجاب کے سابق سینئر وزیر اور پی ٹی آئی کے منحرف رہنما عبدالعلیم خان نے سرکاری افسران کے تقرر و تبادلوں میں فرح خان کے اثرو رسوخ کا دعویٰ کیا ہے اور ان کا کہنا تھا کہ فرح خان اس عمل میں بھاری رقم لیتی تھیں۔
وفاق میں پی ٹی آئی حکومت کے خاتمے کے بعد فرح خان 3 اپریل کی صبح دبئی روانہ ہو گئی تھیں۔
