08 اپریل ، 2022 
سنگین کرپشن کے الزامات پر خاتون اول کی دوست فرح خان کا مؤقف سامنے آگیا
08 اپریل ، 2022
خاتون اول بشریٰ بی بی کی قریبی دوست فرح خان نے اپنے اوپر عائد کرپشن کے الزامات کی تردید کردی۔
انسٹاگرام پر شیئر کی گئی اسٹوری میں فرح خان نے خود پر لگائے گئے الزامات کے حوالے سے بات کی۔
فرح خان نے کہا کہ ’میں اپنے اور اپنے خاندان سے متعلق افواہوں اور الزامات کی شدید الفاظ میں مذمت کرتی ہوں، میرا سیاست سے کوئی تعلق نہیں، میں نےکبھی سرکاری کام میں مداخلت نہیں کی‘۔
فرح خان نے واضح کیا کہ میرے کردار پر کیچڑ اچھالنے والوں کی اپنی بھی بہن بیٹیاں ہیں، میرے بزنس کے بارے میں میرے شوہرپہلے وضاحت دے چکے ہیں جن لوگوں کا مجھ سے تعلق ہے وہ بھی ان الزامات کو مسترد کرچکے ہیں۔
انہوں نے درخواست کرتے ہوئے کہا کہ میری فیملی ان الزامات کے باعث مسلسل پریشانی اور تکلیف کا شکار ہے، برائے مہربانی جھوٹی افواہیں پھیلانا بند کریں۔
فرح خان کا معاملہ کیا ہے؟
گزشتہ دنوں فرح خان کا لگژری بیگ اور جوتے بھی سوشل میڈیا پر زیر بحث رہے جب کہ فرح خان کی کرپشن کے حوالے سے پی ٹی آئی کے منحرف رہنما عبدالعلیم خان نے کئی دعوے کیے ہیں۔
علیم خان کا دعویٰ ہےکہ وہ پنجاب میں سرکاری افسران کی ٹرانسفر پوسٹنگ پر اثر انداز ہوتی تھیں اور اس سارے کام کے کروڑوں روپے وصول کیے جاتے تھے۔
