وزیراعظم آزاد کشمیر کے انتخاب کیلئے قانون ساز اسمبلی کا اجلاس کل طلب

صدر آزاد جموں و کشمیر نے قانون ساز اسمبلی کے قائد کے انتخاب کے لیے اجلاس 18 اپریل کو صبح ساڑھے 10 بجے طلب کر لیا ہے۔

ذرائع کے مطابق اسپیکر قانون ساز اسمبلی چوہدری انوار الحق وزارت عظمیٰ کا انتخابی عمل مکمل کرائیں گے۔

آزاد جموں و کشمیر قانون ساز اسمبلی میں وزیر اعظم کے انتخاب میں 53 اراکین اسمبلی ووٹ ڈالیں گے جبکہ کامیابی کے لیے 27 ووٹ درکار ہیں۔

آزاد کشمیر اسمبلی میں پی ٹی آئی کے 32، پپیپلز پارٹی کے 12، مسلم لیگ 7، جے کے پی پی اور مسلم کانفرنس کا ایک ایک ووٹ ہے۔

ذرائع کے مطابق چیئرمین تحریک انصاف عمران خان نے سردار تنویر الیاس کو وزارت عظمیٰ کا امیدوار نامزد کر دیا ہے جبکہ پیپلزپارٹی آزاد کشمیر اور مسلم لیگ ن کے مشترکہ امیدوار چوہدری یاسین ہوں گے۔

آزاد کشمیر کے آئین کے مطابق وزارت عظمیٰ کا انتخاب شو آف ہینڈ کے ذریعے ہو گا جبکہ وزارت عظمیٰ کی کامیابی کے لیے دونوں اطراف سےکامیابی کے دعوے کیے جا رہے ہیں۔