صحت و سائنس

ذیابیطس سے متاثر کووڈ کے مریضوں میں موت کا خطرہ دگناہوتا ہے، تحقیق

12 مئی ، 2022

یہ بات برطانیہ میں ہونے والی ایک طبی تحقیق میں سامنے آئی / فائل فوٹو

ذیابیطس کے مریضوں میں کووڈ 19 سے متاثر ہونے پر ہلاک ہونے کا خطرہ دیگر افراد کے مقابلے میں لگ بھگ دگنا ہوتا ہے۔

برطانیہ کی ابرڈین یونیورسٹی کی تحقیق میں دریافت کیا گیا کہ ذیابیطس کے مریض اگر کورونا وائرس سے متاثر ہوجائیں تو ان میں بیماری کی شدت سنگین ہونے کا خطرہ 3 گنا زیادہ ہوتا ہے مگر بلڈ شوگر کی سطح کو کنٹرول میں رکھنے سے یہ خطرہ کم ہوجاتا ہے۔

یہ بھی پڑھیں

یہ نتائج 2 لاکھ 70 ہزار سے زیادہ افراد پر ہونے والی 158 تحقیقی رپورٹس کے جامع تجزیے کے بعد سامنے آئے ۔

اس نئی تحقیق کا مقصد یہ تعین کرنا تھا کہ کووڈ 19 سے ذیابیطس کے مریضوں پر کس طرح کے اثرات مرتب ہوتے ہیں۔

ماہرین نے بتایا کہ ہم نے دریافت کیا کہ کووڈ 19 سے متاثر ہونے پر ذیابیطس کے مریض کی موت کا خطرہ ذیابیطس سے محفوظ فرد کے مقابلے میں نمایاں حد تک زیادہ ہوتا ہے۔

انہوں نے کہا کہ ڈیٹا سے عندیہ ملتا ہے کہ ذیابیطس کے مریضوں کے لیےآکسیجن سپورٹ اور آئی سی یو میں داخلے کا خطرہ دیگر مریضوں کے مقابلے میں زیادہ ہوتا ہے۔

تحقیق میں یہ بھی دریافت کیا گیا کہ چین، کوریا اور مشرق وسطیٰ میں ذیابیطس کے مریض اگر کووڈ سے متاثر ہوتے ہیں تو ان کی موت کا خطرہ امریکا یا یورپی یونین کے ممالک کے رہائشیوں کے مقابلے میں زیادہ ہوتا ہے، جس کی وجہ مغربی ممالک میں طبی سہولیات بہتر ہونا ہے۔

ماہرین کا کہنا تھا کہ ہم نے مشرقی اور مغربی دنیا میں کووڈ کے اثرات میں فرق کو دریافت کیا ہے۔