26 مئی ، 2022 
یاسین ملک کو عمر قید کی سزا، اہلیہ مشعال کا ردِعمل سامنے آگیا
26 مئی ، 2022
کشمیری حریت رہنما یاسین ملک کی اہلیہ مشعال ملک نے شوہر کو بھارت کی جانب سے عمر قید کی سزا سنائے جانے کے بعد اپنے بیان میں کہا ہے کہ ہم کبھی ہار نہیں مانیں گے اور نہ ہی ہمت ہاریں گے۔
ٹوئٹر پر بیان جاری کرتے ہوئے مشعال ملک نے کہا کہ 'یاسین ملک اس مٹی کے بیٹے ہیں ،ہر کشمیری اور پاکستانی یاسین ملک کی آزادی کیلئے آواز بلند کرتا رہے گا'۔
ان کا مزید کہنا تھا کہ عظیم رہنما بھارتیوں سے زندگی کی بھیک نہیں مانگیں گے اور نہ ہی سرینڈر کریں گے جبکہ آخری سانس تک جدوجہد آزادی جاری رہے گی۔
واضح رہے کہ بھارتی عدالت نےکشمیری حریت رہنما یاسین ملک کو 19مئی کو دہشتگردی کی فنڈنگ کے جھوٹے مقدمے میں مجرم قرار دیا تھا۔
تاہم بدھ کے روز یاسین ملک کو بھارتی عدالت نے 2 بار عمر قید کی سزا سنائی جب کہ ان پر 10 لاکھ بھارتی روپے کا جرمانہ بھی کیا گیا۔
