اسلام آباد اور لاہور ائیرپورٹس پر مسافروں کے سامان سے منشیات برآمد
03 جون ، 2022
ائیرپورٹس سکیورٹی فورس نے اسلام آباد اور لاہور ائیرپورٹس پر کارروائیاں کرکے دو مسافروں کے سامان سے منشیات برآمد کرلی۔
ترجمان اے ایس ایف کے مطابق اے ایس ایف کے عملے نے اسلام آباد سے ابوظبی جانے والے مسافر محمد عدنان خان سے 1.8 کلو گرام حشیش جب کہ لاہور سے بحرین جانے والے مسافر عبدالرحمان سے950 گرام آئس ہیروئن برآمد کی۔
اے ایس ایف کا بتانا ہےکہ دونوں مسافروں نے منشیات اپنے اپنے بیگز میں انتہائی مہارت سے چھپا رکھی تھی تاہم اے ایس ایف کے عملے نے سامان کی تلاشی کے دوران منشیات برآمد کر کے اسمگلنگ کی کوششں ناکام بنا دی۔
اے ایس ایف کے مطابق ملزمان کو ابتدائی تفتیش کے بعد برآمد شدہ منشیات سمیت مزید قانونی کارروائی کے لیے اے این ایف حکام کے حوالے کر دیا گیا ہے۔
