انٹار کٹیکا کی سطح کے نیچے چھپی بحری حیات کی'خفیہ دنیا' دریافت

06 جون ، 2022

سائنسدانوں نے برفانی براعظم انٹارکٹیکا کی برفانی تہہ کے نیچے چھپی ایک 'خفیہ دنیا' تلاش کرلی ہے۔

نیوزی لینڈ کے سائنسدانوں نے روس آئس شیلف سے چند سو کلومیٹر دور واقع برف کی تہہ کے نیچے ایک دریا میں جھینگوں سے ملتے جلتے جانداروں کو دریافت کیا ہے۔

یہ سائنسدان یہ جاننے کی کوشش کررہے تھے کہ موسمیاتی تبدیلیوں سے برفانی سطح پر کیا اثرات مرتب ہوئے ہیں۔

مگر جب انہوں نے ایک جگہ کھدائی کی تو وہاں دریا دریافت ہوا اور اس کے اندر بھیجے گئے کیمرے پر ایمفی پوڈز نامی مچھلیوں کے گروپ نے دھاوا بول دیا۔

سائنسدانوں کے مطابق کچھ وقت تک تو ہمیں لگا کہ کیمرے میں کوئی خرابی ہے مگر جب منظر کچھ بہتر ہوا تو ہم نے 5 ملی میٹر حجم کی مچھلیوں کو دیکھا۔

انہوں نے مزید بتایا کہ ہم یہ منظر دیکھ کر اچھل پڑے تھے کیونکہ ان جانداروں سے واضح ہوتا ہے کہ یہاں زندگی کے لیے سازگار ماحول موجود ہے۔

اسی ٹیم نے کچھ عرصے قبل روس آئس شیلف کی سیٹلائیٹ تصاویر سے برف کے نیچے چھپے دریا کے دہانے کو دریافت کیا تھا۔

سائنسدانوں نے بتایا کہ اگرچہ ہم انٹارکٹیکا کی برفانی تہہ کے نیچے چھپے دریاؤں سے واقف ہیں مگر اب تک ان کا براہ راست سروے نہیں کیا جاسکا۔

ان کا کہنا تھا کہ اب ایک دریا کا مشاہدہ کرنا ایسا ہی ہے جیسے ہم پہلی بار کسی خفیہ دنیا میں داخل ہورہے ہیں۔

انہوں نے آلات کو مشاہدے کے لیے دریا میں چھوڑ دیا جبکہ لیبارٹری میں یہ جانچ پڑتال کی جائے گی کہ کیا چیز اس پانی کو منفرد بناتی ہے۔

مزید خبریں :