بجٹ میں 355 ارب روپے کے اضافی ٹیکسز لگائے گئے ہیں، ایف بی آر

فیڈرل بورڈ آف ریونیو (ایف بی آر) کے چیئرمین عاصم احمد نے کہا ہے کہ آئندہ مالی سال کے بجٹ میں 355 ارب روپے کے اضافی ٹیکسز لگائے گئے ہیں۔

چیئرمین ایف بی آرکا کہنا تھاکہ بجٹ میں عام آدمی کو ریلیف فراہم کیاگیا ہے جبکہ مقامی ٹیکسز 52 فیصد اور 48 فیصد ہمارے درآمدات کے ٹیکسز  ہیں۔

ان کا کہنا تھاکہ تنخواہ دار طبقے کو حکومت نے ریلیف فراہم کیا ہے اور بجٹ میں 355 ارب روپے کے اضافی ٹیکسز لگائے گئے ہیں۔

95 کھرب 2 ارب روپے کا وفاقی بجٹ پیش، سرکاری ملازمین کی تنخواہوں میں 15 فیصد اضافہ

ترقیاتی پروگرامز کیلئے 800 ارب، دفاع کیلئے 1523 ارب، پنشن کی مد میں 530 ارب، ایچ ای سی کیلئے 65 ارب روپے مختص، بے نظیر پروگرام کیلئے رقم 250 ارب سے بڑھا کر 364 ارب روپے کردی گئی

چیئرمین ایف بی آر کے مطابق زیادہ آمدن والے افراد پر ٹیکس لگایا گیا ہے اور نان فائلرز پر اضافی ٹیکس لگائے گئے ہیں، ریئل اسٹیٹ، فارم ہاؤسز پر ٹیکس بڑھائے گئے ہیں۔

انہوں نے بتایا کہ ٹریکٹرکی درآمد اور سولرپینل پرکسٹم ڈیوٹی میں چھوٹ دی گئی ہے جبکہ ایل ای ڈی لائٹس کو سستا کرنے کے اقدامات کیےہیں اور ادویات کے خام مال کو سستا کیا گیا ہے، اس کے علاوہ بیجوں، ٹریکٹرز، پاور پلانٹس کی مشینری کی درآمد پر سیلز ٹیکس ختم کردیا گیا ہے۔

چیئرمین ایف بی آر کا کہنا تھاکہ اگلے سال کیلئے ٹیکس ہدف 7004 ارب روپے مقرر کیا گیا ہے اور بجٹ میں 355 ارب روپے کے ٹیکس اقدامات کیے گئے ہیں، 75 فیصد ٹیکس تجاویزانکم ٹیکس سمیت ڈائریکٹ ٹیکسزسے متعلق ہیں، پورا فوکس ڈائریکٹ ٹیکسوں کی طرف ہے۔