کراچی: این اے 240 میں ضمنی الیکشن کیلئے پولنگ کا وقت ختم

کراچی میں قومی اسمبلی کی نشست این اے 240 میں ضمنی الیکشن کے لیے پولنگ کا وقت ختم ہوگیا ہے اور  اب ووٹوں کی گنتی جاری ہے۔

پولنگ صبح 8 بجے سے شام 5 بجے تک بلا کسی تعطل کے جاری رہی، پولنگ اسٹیشنز کے احاطے میں موجود ووٹرز کو ووٹ ڈالنےکی اجازت ہے۔

پولنگ کے دوران گورنمنٹ بوائزپرائمری اسکول انصاری محلہ یوسی 2 لانڈھی میں دو سیاسی جماعتوں میں تصادم ہوگیا، سیاسی جماعت کے کارکنوں کو منتشر کرنےکے لیے پولیس نے لاٹھی چارج کیا، جھگڑےکے باعث متعدد سیاسی کارکن زخمی ہوگئے، پولیس نے صورت حال پر قابوپالیا۔

اس دوران حلقے میں پاک سر زمین پارٹی (پی ایس پی) کے صدر انیس قائم خانی کی گاڑی پر فائرنگ کا واقعہ بھی پیش آیا۔ذرائع کے مطابق انیس قائم خانی فائرنگ کے وقت گاڑی میں نہیں تھے، انیس قائم خانی کی گاڑی کے ساتھ چلنے والی پولیس موبائل پر بھی گولی لگی۔

انیس قائم خانی نے دعویٰ کیا ہےکہ ان کی گاڑی پر 4 سے 5 افراد نے فائرنگ کی،گاڑی پر4 گولیاں لگی ہیں۔

 اس کے علاوہ لانڈھی نمبر 6 میں مختلف مقامات پر فائرنگ کے واقعات بھی سامنے آئے، جناح اسپتال انتظامیہ کے مطابق 4 زخمی لائے گئے تھے جن میں سے ایک  زخمی دوران علاج دم توڑ گیا۔

ادھر لانڈھی نمبر 5 زمان آباد میں پریزائیڈنگ آفیسر اور سیاسی جماعت کے کارکن کو پولیس نے گرفتارکرلیا، دونوں افراد کےخلاف جعلی ووٹ کاسٹ کرنے کی شکایت کی گئی تھی۔

ریجنل الیکشن افسرکے مطابق پولنگ اسٹیشن نمبر 87 پر پولنگ بک کی مبینہ ہیر پھیر کا واقعہ سامنے آیا، واقعہ پریزائیڈنگ افسرکےدفتر میں پیش آیا، جہاں پولنگ بک رکھی تھی وہاں نامعلوم شخص آیا اور پولنگ بک کھڑکی سے کسی کو دینےکی کوشش کی، پولیس اہلکار نے اس شخص کو پکڑ لیا اور پولنگ بک لے لی۔

حلقے کےکل 309 پولنگ اسٹیشنز میں سے 203 انتہائی حساس قرار دیےگئے ہیں جہاں پولنگ اسٹیشنز سمیت بوتھس پر بھی کیمرے نصب کیے گئے ہیں۔

حلقے میں 309 پولنگ اسٹیشنزپر رجسٹرڈ ووٹرز کی تعداد 5 لاکھ 29 ہزار سے زائد ہے، متحدہ قومی موومنٹ کے ابوبکر، مہاجرقومی موومنٹ کے رفیع الدین فیصل،  پاک سرزمین پارٹی کے شبیر قائم خانی، پیپلز پارٹی کے ناصرلودھی،  تحریک لبیک کے کاشف قادری سمیت  25 امیدوار میدان میں ہیں جب کہ  تحریک انصاف اور جماعت اسلامی نے مقابلے میں حصہ نہیں لیا۔

یہ نشست ایم کیوایم پاکستان کےاقبال محمدعلی خان کےانتقال پرخالی ہوئی تھی۔