16 جون ، 2022 
مسلم لیگ ن کے رہنما دانیال عزیز روڈ حادثے میں زخمی،گاڑی مکمل تباہ
16 جون ، 2022
مسلم لیگ ن کے رہنما دانیال عزیز شکر گڑھ میں روڈ حادثے میں زخمی ہوگئے۔
ریسکیو حکام کے مطابق شکر گڑھ کے علاقے بھجنہ میں دانیال عزیز کی گاڑی کی ٹرک سے ٹکر ہوگئی جس کے نتیجے میں دانیال عزیز زخمی جبکہ ٹرک ڈرائیور جاں بحق ہوگیا۔
ڈاکٹرز کے مطابق دانیال عزیز کے جسم کے مختلف حصوں پر زخم آئے ہیں جبکہ ان کا ایک بازو ٹوٹ گیا اور دوسرا بھی زخمی ہے۔
ریسکیو ذرائع کے مطابق دانیال عزیز خود گاڑی چلا رہے تھے،حادثے کی صورت میں ان کی گاڑی مکمل تباہ ہوگئی ۔
ریسکیو حکام کے مطابق دانیال عزیز کو ڈی ایچ کیو اسپتال نارووال منتقل کیا گیا جہاں سے بعد ازاں انہیں لاہور ریفر کیا گیا۔
تاہم اب دانیال عزیز کو ایمبولینس کے ذریعے سروسز اسپتال لاہور کے لیے روانہ کردیا گیا ہے۔
ڈی ایچ کیو اسپتال کے ایم ایس کا کہنا تھا کہ دانیال عزیز کی حالت اب خطرے سے باہر ہے۔
دوسری جانب وزیر اعظم شہباز شریف نے دانیال عزیز کی اہلیہ سے ٹیلی فون پر رابطہ کیا اور کہا کہ مسلم لیگ ن کے رہنما کی صحت یابی کیلئے دعا گو ہیں۔
انہوں نے کہا کہ دانیال عزیز بیٹوں کی طرح ہے، حادثے کی خبر پر بہت دکھ ہوا ہے۔
اس کے علاوہ وزیراعلیٰ پنجاب حمزہ شہباز نے اپنے ایک بیان میں کہا ہے کہ دانیال عزیز کو علاج معالجے کی بہترین سہولتیں فراہم کی جائیں۔
حمزہ شہباز نے حادثے میں ایک شخص کے جاں بحق ہونے پر افسوس کا اظہارکرتے ہوئے کمشنر گوجرانوالہ ڈویژن اور آر پی او سے رپورٹ طلب کرلی ہے۔
