لمپی وائرس کا خطرہ: مویشی منڈی میں ہر جانور کو چیک کیا جاتا ہے، مرتضیٰ وہاب
27 جون ، 2022
ایڈمنسٹریٹر کراچی مرتضیٰ وہاب کا کہنا ہے کہ لمپی وائرس سے متاثرہ جانوروں کی منڈیوں تک رسائی کے روک تھام کیلئے اقدامات کیے جارہے ہیں۔
جیو نیوز کی خصوصی ٹرانسمیشن میں ایڈمنسٹریٹر کراچی مرتضیٰ وہاب نے کہا کہ سپر ہائی وے کراچی پر منڈی میں جو بھی جانور لایا جاتا ہے اسے چیک کیا جاتا ہے اور صرف صحت مند جانور کو ہی منڈی میں آنے دیا جاتا ہے۔
انہوں نے کہا کہ کسی کی نجی زمین پر جانوروں کی منڈی لگانا غلط ہے، کسی کی جگہ پر اگر کوئی زبردستی منڈی لگا رہا ہے تو معلومات دیں کارروائی ہوگی، جب تک کوئی شکایت نہیں آتی تو کارروائی کیسے ہوگی ؟
مرتضیٰ وہاب نے بتایا کہ کراچی میٹروپولیٹن کارپوریشن (کے ایم سی) نے 2 بڑی مویشی منڈیوں کی این او سی دی ہے، مویشی منڈیوں میں پانی اور دیگر انتظامات منتظمین کا کام ہے کے ایم سی کا نہیں، گلی محلوں میں منڈیوں کی این او سی کم ایم سی نہیں دیتی یہ ڈسٹرکٹ میونسپل کارپوریشنز (ڈی ایم سیز) کے اختیار میں ہے۔
مرتضیٰ وہاب نے کہا کہ ڈاکٹرز نے بتایا ہے کہ لمپی وائرس سے جانور کا گوشت متاثر نہیں ہوتا۔
علاوہ ازیں ڈی جی لائیو اسٹاک سندھ ڈاکٹر نذیر حسین کا دعویٰ ہے کہ صوبے میں لمپی اسکن بیماری پر کافی حد تک قابو پالیا گیا ہے، گزشتہ روز لمپی کے صرف 17 کیسز رپورٹ ہوئے۔
