احمد شہزاد کے الزامات پر چیئرمین پی سی بی کا بیان سامنے آگیا

پاکستان کرکٹ بورڈ کے چیئرمین رمیز راجہ نے اوپننگ بیٹر احمد شہزاد کی جانب سے ہیڈ کوچ وقار یونس پر لگائے گئے الزامات  پر شدید ردعمل دیا ہے۔

بدھ کو لاہور میں پریس کانفرنس کرتے ہوئے رمیز راجہ نے احمد شہزاد کے بیان کو مکمل مایوسی اور ناکامی قرار دیا۔

چیئرمین پی سی بی نے کہا کہ ' جب آپ ٹیم سے باہر ہوتے ہیں تو  اس وقت آپ کے صبر اور مزاج کا امتحان ہوتا ہے'۔

رمیز راجہ کا کہنا تھا کہ 'میں احمد شہزاد کو مشورہ دوں گا کہ اپنے بلے کو بولنے دیں اور اچھا اسکور کریں پھر آپ ٹیم سے باہر نہیں ہوں گے'۔

پی سی بی مجھ سے متعلق رپورٹ سامنے لائے: احمد شہزاد کا مطالبہ

عوام کو بتایاجائے کہ احمد شہزاد نے یہ غلطیاں کی ہیں اور پھر میری وضاحت بھی لی جائے : قومی کرکٹر

رمیز راجہ نے بیٹر شان مسعود کی مثال دی اور کہا  کہ' شان مسعود کو دیکھیں، انہوں نے خود پر محنت کی اور بہترین رنز بناکر اپنی جگہ قومی ٹیم میں بنائی'۔ 

واضح رہے کہ چند روز قبل لاہور میں میڈیا سے گفتگو میں احمد شہزاد نے کہا تھا کہ میرے بارے میں ماضی کی ٹیم مینجمنٹ نے جو رپورٹ پاکستان کرکٹ بورڈ کو جمع کرائی اور جس کی بنیاد پر مجھے ٹیم سے دور رکھ کر نقصان پہنچایا گیا ہے اس کو عوام کے سامنے لایا جائے۔