آئی ایم ایف سے قرض کے معاملے پر بنگلادیش کا مؤقف سامنے آگیا

بنگلا دیش کا  عالمی مالیاتی فنڈ (آئی ایم ایف) سے قرض کے معاملے پر مؤقف سامنے آیا ہے۔

بنگلادیشی وزیر خزانہ اے ایچ مصطفیٰ کا کہنا ہے کہ آئی ایم ایف کو قرض کا کہا ہے لیکن معیشت مشکلات کا شکار نہیں۔

انہوں نے کہا کہ آئی ایم ایف کو خط میں قرض کی رقم ابھی نہیں بتائی، قرضے کیلئے آئی ایم ایف کی شرائط کا انتظار کر رہے ہیں۔

آئی ایم ایف پاکستان کو ایک ارب 17 کروڑ ڈالر فراہم کرے گا، معاہدہ طے پا گیا

پاکستان کو حالیہ بجٹ پر سختی سے عمل کرنا ہو گا: اعلامیہ آئی ایم ایف

اے ایچ مصطفیٰ نے کہا کہ  آئی ایم ایف کی شرائط ملکی مفاد میں ہوئیں تو قرضہ لیں گے ورنہ نہیں، قرض لینے کا یہ مطلب نہیں کہ بنگلا دیشی معیشت برےحال میں ہے۔

دوسری جانب غیر ملکی خبر رساں ایجنسی کا دعویٰ ہے کہ بنگلا دیش نے آئی ایم ایف سے ساڑھے 4 ارب ڈالر کا قرض مانگا ہے۔

اس حوالے سے آئی ایم ایف کا کہنا ہے کہ وہ بنگلادیش کی جانب سے قرض کی درخواست پر بات چیت کیلئے تیار ہے۔

واضح رہے کہ بنگلادیش ، پاکستان اور سری لنکا کے بعد تیسرا جنوبی ایشیائی ملک ہے جو آئی ایم ایف سے قرض کا خواہاں ہے۔

برطانوی خبر رساں ایجنسی رائٹرز کے مطابق بنگلادیش کے زرمبادلہ کے ذخائر ایک سال کے اندر 20 جولائی تک کم ہوکر 39.67 ارب ڈالر پر آگئے ہیں جو صرف پانچ ماہ کی امپورٹس کیلئے کافی ہیں۔