کپل شرما کو فلم ’غدر‘ کے سیٹ سے تھپڑ مار کر کیوں نکالا گیا تھا؟

بالی وڈ کی بلاک بسٹر فلم ’غدر اِک پریم کتھا‘ کے ایکشن ڈائریکٹر ٹینو ورما نے انکشاف کیا ہے کہ اس فلم کے سیٹ سے انہوں نے معروف کامیڈین کپل شرما کو تھپڑ مار کر باہر نکال دیا تھا۔

بالی وڈ اداکار مکیش کھنا سے گفتگو کرتے ہوئے ٹینو ورما نے بتایا کہ ’فیروز آباد میں 45 ڈگری سینٹی گریڈ کی گرمی میں فلم کا اوپننگ سین شوٹ کرنا تھا، 25 ہزار کا مجمع تھا جو سرداروں کا روپ دھارا ہوا تھا اور انہیں میں 11 کیمروں کی مدد سے شوٹ کر رہا تھا۔‘

ہم نے نہیں کپل شرما شو نے پاکستانی کانسیپٹ ’کاپی ‘ کیا: تابش ہاشمی

ایک اسٹیج پر سیٹ لگا ہوا ہے اور کامیڈی ہورہی ہے یہ دراصل پاکستان کا کانسیپٹ ہے: جیو ڈیجیٹل سے گفتگو

انہوں نے مزید بتایا کہ ’اس واقعے کے حوالے سے کپل شرما نے خود بھی اپنے شو میں سنی دیول اور امیشا پٹیل کے سامنے تذکرہ کیا ہے۔‘

ٹینو ورما نے بتایا کہ ’کپل شرما کے والد پولیس میں تھے، انہوں نے کپل سے کہا تھا کہ اگر تمہیں اداکار بننا ہے تو غدر کی شوٹنگ چل رہی ہے وہاں کرتا پاجامہ پہن کر جاؤ۔‘

ایکشن ڈائریکٹر ٹینو ورما نے بتایا کہ ’ مجھے خود کیمرہ آپریٹ کرنے کا شوق ہے، میں کیمرے پر دیکھ رہا تھا، سین یہ تھا کہ ہزاروں افراد کا مجمع ٹرین کی طرف بھاگ رہا ہے، اچانک ایک شخص مجمع سے نکل کر دوسری طرف بھاگنے لگا، میں نے اسے بلایا اور کہا کہ تمہاری وجہ سے ایکسٹرا شاٹ لینا پڑ رہا ہے، اس طرف نہیں بھاگنا، مجمع کے ساتھ ہی جانا ہے۔‘

ٹینو ورما نے کہا کہ ’میرا فوکس اب اس شخص پر ہی تھا مجھے لگ رہا تھا یہ پھر کچھ غلطی کرے گا اور وہی ہوا، جیسے ہی وہ دوبارہ دوسری جانب بھاگا میں بھی کیمرہ چھوڑ کر بھاگا، اسے پکڑا اور دیا کان کے نیچے ایک تھپڑ اور کہا نکالو اس کو سیٹ سے باہر، یہ شخص کپل شرما تھا۔‘

کپل شرما نے اس واقعے کا تذکرہ اپنے شو میں کرتے ہوئے کہا تھا کہ جب فلم ریلیز ہوئی تو وہ اپنے دوستوں کو لے کر اپنا سین دکھانے گئے لیکن معلوم ہوا کہ ان کا سین ایڈٹنگ میں کاٹ دیا گیا ہے۔

2001 میں ریلیز ہونے والی فلم غدر میں سنی دیول اور امیشا پٹیل نے مرکزی کردار ادا کیا تھا جبکہ اب اس کا سیکوئل بھی تکمیل کے مراحل میں ہے۔