30 جولائی ، 2022 
پی ٹی آئی نمائندوں اور تنظیموں کو بلوچستان میں فعال کردار ادا کرنیکی ہدایت
30 جولائی ، 2022
پاکستان تحریک انصاف کے سیکرٹری جنرل اسد عمر نے پی ٹی آئی بلوچستان کے نمائندوں اور تنظیموں کو سیلاب سے متاثرہ علاقوں میں فعال کردار ادا کرنے کی ہدایت کر دی۔
ٹوئٹر پر جاری بیان میں اسد عمر نے بتایا کہ ملک کے کئی علاقوں خصوصاً بلوچستان میں سیلاب سے بڑے پیمانے پر تباہ کاری ہوئی ہے اور اب تک 100 سے زائد افراد ہلاک ہوئے ہیں۔
رہنما پی ٹی آئی نے لکھا کہ وفاقی اور صوبائی حکومتوں کو سیلاب سے متاثرہ افراد کی بروقت اور بھرپور مدد کرنی چاہیے، ان علاقوں میں تحریک انصاف کے منتخب نمائندوں اور تنظیموں کو بھی فعال کردار ادا کرنے کی ہدایت کی ہے۔
دوسری جانب اسد عمر نے حکومت کو تنقید کا نشانہ بناتے ہوئے لکھا کہ بنیادی ضروریات کی اشیا کے افراط زر میں 37فیصد سے زائد اضافہ ہوا جو پاکستان کی تاریخ کی بلند ترین سطح ہے۔
انھوں نے مزید لکھا کہ صرف ایک ہفتے میں 3.68فیصد کا اضافہ، پاکستان کی تاریخ میں کبھی ایک ہفتے میں اتنا اضافہ نہیں ہوا، امپورٹڈ حکومت نے مہنگائی کے تمام ریکارڈ توڑ دیے ہیں۔
