امریکا نے اچانک بین البراعظمی بیلسٹک میزائل کا تجربہ کیوں مؤخر کر دیا؟

امریکا نے بین البراعظمی بیلسٹک میزائل کا تجربہ مؤخر کردیا۔

امریکی میڈیا کے مطابق امریکا نے  تائیوان کشیدگی کے تناظر میں منٹ مین 3 میزائل کا تجربہ مؤخر کیا۔

رپورٹس کے مطابق چین کےساتھ بڑھتے تناؤ سے بچنےکیلئے امریکا کی جانب سے  میزائل کا تجربہ کچھ روز کے لیے مؤخر کیا گیا ہے۔

دوسری جانب اس خبر پر امریکی محکمہ دفاع  پینٹاگون حکام کا ابھی کوئی تبصرہ سامنے نہیں آیا۔

واضح رہے کہ امریکی ایوان نمائندگان کی اسپیکر نینسی پلوسی کے متنازع دورہ تائیوان پر چین نے تائیوان کے قریب سب سے بڑی جنگی مشقوں کا آغاز کر دیا۔

امریکی اسپیکر کا متنازع دورہ تائیوان، چین نے سب سے بڑی جنگی مشقیں شروع کر دیں

چینی حکام کے مطابق جنگی مشقیں مصروف پانیوں میں کی جائیں گی جس میں دور تک مار کرنے والے میزائلوں کا براہ راست مشاہدہ بھی شامل ہے۔

چین نے امریکا کو خبردار کیا تھا کہ اگر نینسی پلوسی نے تائیوان کا دورہ کیا تو چین کی فوج ہاتھ پر ہاتھ رکھ کر نہیں بیٹھے گی لیکن اس کے باوجود امریکی ایوان نمائندگان کی اسپیکر نینسی پلوسی تائیوان کے دورے پر پہنچ گئیں جس پر امریکا اور چین کے درمیان تناؤ مزید شدت اختیار کر گیا ہے۔