07 اگست ، 2022 
ایم پی اے ملک لیاقت ہوش میں نہیں، صحتیابی سے متعلق کچھ کہنا قبل از وقت ہے: ایل آر ایچ ترجمان
07 اگست ، 2022
ترجمان لیڈی ریڈنگ اسپتال کا کہنا ہے کہ گزشتہ روز لوئر دیر میں ہونے والے قاتلانہ حملے میں زخمی ہونے والے پاکستان تحریک انصاف کے رکن صوبائی اسمبلی ملک لیاقت خان کی مکمل صحتیابی سے متعلق کچھ کہنا قبل از وقت ہے۔
پی ٹی آئی کے زخمی ایم پی اے ملک لیاقت خان لیڈی ریڈنگ اسپتال پشاور میں زیر علاج ہیں۔
ترجمان لیڈی ریڈنگ اسپتال کا کہنا ہے کہ ملک لیاقت خان کے پیٹ میں اور کندھے پر گولیاں لگیں، رکن صوبائی اسمبلی کا آپریشن کرکے انہیں وارڈ میں منتقل کر دیا گیا ہے۔
ترجمان ایل آر ایچ کے مطابق ملک لیاقت مکمل ہوش میں نہیں ہیں، ان کی مکمل صحتیابی سے متعلق کچھ کہنا قبل از وقت ہو گا۔
اسپتال ترجمان نے مزید بتایا کہ ایم پی اے کے ساتھ زخمی تین افراد بھی اسپتال میں زیر علاج ہیں، زخمیوں میں ملک لیاقت خان کا بھتیجا حذیفہ بھی شامل ہے۔
یاد رہے کہ ملک لیاقت خان گزشتہ شب لوئر دیر میں ہونے والے قاتلانہ حملے میں زخمی ہو گئے تھے جبکہ فائرنگ کے نتیجے میں ملک لیاقت کا بھائی، بھتیجا اور دو سکیورٹی اہلکار جاں بحق ہو گئے تھے۔
